ព័ត៌មានជាតិ

ពលរដ្ឋជាង២ពាន់គ្រួសារ ដែលរងគ្រោះដោយជំនន់ទឹកភ្លៀងតាមដងស្ទឹងព្រែកត្នោត ក្នុងខណ្ឌដង្កោ ទទួលបានអំណោយមនុស្សធម៌ពីសម្តេចតេជោ និងសម្តេចកិត្តិព្រឹទ្ធបណ្ឌិត

ពលរដ្ឋជាង២ពាន់គ្រួសារ ដែលរងគ្រោះដោយជំនន់ទឹកភ្លៀងតាមដងស្ទឹងព្រែកត្នោត ក្នុងខណ្ឌដង្កោ ទទួលបានអំណោយមនុស្សធម៌ពីសម្តេចតេជោ និងសម្តេចកិត្តិព្រឹទ្ធបណ្ឌិត

(ភ្នំពេញ)៖ ប្រជាពលរដ្ឋ២២២៥គ្រួសារ ដែលរងគ្រោះដោយជំនន់ទឹកភ្លៀង នៅតាមសណ្តរស្ទឹងព្រែកត្នោត ក្នុងខណ្ឌដង្កោ បានទទួលអំណោយមនុស្សធម៌ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដើម្បីជួយដោះស្រាយជីវភាព និងទុក្ខលំបាករបស់ប្រជាពលរដ្ឋបានរងគ្រោះដោយជំនន់ទឹកភ្លៀងនេះ។

 

អំណោយទាំងនេះត្រូវបានប្រគល់ជូនប្រជាពលរដ្ឋតាមរយៈលោក ឃួង ស្រេង អភិបាលរាជធានីភ្នំពេញ និងលោកស្រី នៅព្រឹកថ្ងៃទី១៧ ខែមករា ឆ្នាំ២០២៣ នៅក្នុងបរិវេណវត្តកំពុងក្តុល សង្កាត់សាក់សំពៅ ខណ្ឌដង្កោ។

 

លោក ឃួង ស្រេង បានឱ្យដឹងថា អំណោយដែលបានប្រគល់ជូននាពេលនេះ គឺជាទឹកចិត្តរបស់សម្តេចតេជោ និងសម្តេចកិត្តិព្រឹទ្ធបណ្ឌិត ដែលមើលឃើញពីទុក្ខលំបាករបស់ប្រជាពលរដ្ឋក្នុងការចូលរួមចំណែក ជួយសម្រាល ក្នុងជីវភាពរស់នៅប្រចាំថ្ងៃ ជាពិសេសនេះជាការផ្តល់អាហារទាន់ពេលវេលា ដែលសម្ដេចតេជោតែងតែណែនាំទៅដល់គ្រប់អាជ្ញាធរថ្នាក់ក្រោមជាតិ ក៏ដូចជាក្រសួង មន្ទីរពាក់ព័ន្ធ គឺត្រូវអនុវត្តឱ្យបាន ទីណាមានទុក្ខលំបាក ទីនោះមានសម្ដេចតេជោនាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ទីណាមានប្រជាពលរដ្ឋខ្វះស្បៀងអាហារ អាជ្ញាធរត្រូវផ្គត់ផ្គង់ឱ្យបានទាន់ពេលវេលា ដោយមិនទុកឱ្យនរណាម្នាក់ស្លាប់ដោយអត់បាយនោះឡើយ គឺត្រូវគាំពារ និងការពារទៅលើជីវភាពរស់នៅប្រចាំថ្ងៃរបស់ប្រជាពលរដ្ឋ។

 

សម្តេចតេជោ តែងផ្តាំថា ទោះជាមានឧបសគ្គ ឬឧបទ្ទវហេតុអ្វីកើតឡើងក៏ដោយ ត្រូវការពារអាយុជីវិតប្រជាពលរដ្ឋឱ្យខាងតែបាន បន្ទាប់ពីនេះត្រូវបានផ្តល់ស្បៀងអាហារឱ្យបានទាន់ពេលវេលាជូនដល់ប្រជាពលរដ្ឋ ដើម្បីការពារដល់អាយុជីវិតប្រជាពលរដ្ឋបន្តទៅទៀត នេះជាកិច្ចការងារទីមួយរបស់អាជ្ញាធរដែនដីដែលត្រូវអនុវត្តឱ្យបានខ្ជាប់ខ្ជួន ដូច្នេះគោលការណ៍នេះយើងខ្ញុំដែលជាអាជ្ញាធរដែនដីគ្រប់លំដាប់ថ្នាក់ បានខិតខំប្រឹងប្រែងអនុវត្តយ៉ាងខ្ជាប់ខ្ជួន ហើយនេះហើយគឺជាសិទ្ធសេរីភាពរបស់ប្រជាពលរដ្ឋ គឺសិទ្ធិរស់រានមានជីវិត មានសិទ្ធិសម្ដែងមតិ មានសិទ្ធិធ្វើកិច្ចការអ្វីៗសព្វបែបយ៉ាងបន្តទៅទៀត។

 

លោកក៏បានមានប្រសាសន៍ណែនាំដល់ប្រជាពលរដ្ឋដែលមានជីវភាពខ្វះខាត អាចទៅមន្ទីរបក្ស សង្កាត់ ខណ្ឌ ឬរាជធានីភ្នំពេញ ដោយកន្លែងទាំងនេះមានស្បៀងបម្រុងទុកសម្រាប់ជួយដោះស្រាយជីវភាពរស់នៅប្រចាំថ្ងៃរបស់ប្រជាពលរដ្ឋ ដោយមិនទុកនរណាម្នាក់ស្លាប់ដោយអត់បាយនោះទេ។

 

លោក ឃួង ស្រេង ក៏បានអំពាវនាវដល់ប្រជាពលរដ្ឋដែលរស់នៅតាមសណ្តរស្ទឹងព្រែកត្នោត បើទោះបីទឹកស្រកហើយក៏ដោយ ក៏ត្រូវបង្កើនការថែរក្សាអនាម័យសុខភាព និងការពារសុវត្ថិភាពរបស់ក្រុមគ្រួសារឱ្យបានខ្ជាប់ខ្ជួន ដោយកុំឱ្យក្មេងតូចៗលេងទឹកដែលអាចបង្កគ្រោះថ្នាក់ជាយថាហេតុណាមួយកើតឡើង។

 

សូមបញ្ជាក់ថា ទឹកស្ទឹងព្រែកត្នោតបានចាប់ផ្ដើមឡើងខ្លាំង កាលពីថ្ងៃទី១២ ខែមករា ឆ្នាំ២០២៣ ប៉ុន្តែមិនបានឡើងពេញប្រៀបស្ទឹងភ្លាមៗនោះឡើយ រហូតមកដល់វេលាយប់រំលងអាធ្រាត្រ ឈានចូលថ្ងៃទី១៤ ខែមករា ស្រាប់តែឡើងយ៉ាងគំហុកពេញច្រាំង និងហៀរចូលលិចលំនៅដ្ឋានប្រជាពលរដ្ឋជាច្រើនខ្នង ហើយបានស្រកលឿនទៅវិញជាបណ្តើរៗ៕

crt

Leave a Reply

Your email address will not be published.