ព័ត៌មានជាតិ

ការសាងសង់ភូមិកីឡាឈានដល់កម្រិតប្រកាសអាសន្ន, សម្ដេចពិជ័យសេនា ទៀ បាញ់ ជំរុញគណៈកម្មការជំនាញឲ្យតាមដាន និងផ្ដល់យោបល់រាល់ថ្ងៃ ដើម្បីពន្លឿនការសាងសង់ឲ្យបានលឿនបំផុត

ភ្នំពេញ)៖ សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានជំរុញគណៈកម្មការស្នាក់នៅ ហូបចុក និងដឹកជញ្ជូន ត្រូវតាមដាន និងផ្ដល់យោបល់ជាប្រចាំ ដល់ក្រុមហ៊ុនសាងសង់ភូមិកីឡា ដើម្បីពន្លឿនការសាងសង់រួចរាល់តាមការកំណត់ សម្រាប់ត្រៀមទទួលប្រតិភូ និងអត្តពលិកប្រមាណ ៧ពាន់នាក់ ដែលនឹងចូលរួមប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅកម្ពុជា ។

 

នេះបើតាមការបញ្ជាក់របស់លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC-CAMAPGOC បន្ទាប់ពីសម្ដេចពិជ័យសេនា ទៀ បាញ់ អមដំណើរដោយលោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC-CAMAPGOC ព្រមទាំងប្រតិភូ និងគណៈកម្មការពាក់ព័ន្ធ បានអញ្ជើញត្រួតពិនិត្យទីតាំងជាក់ស្ដែង នៃការសាងសង់ភូមិកីឡា និងហេដ្ឋារចនាសម្ព័ន្ធមួយចំនួន ក្នុងពហុកីឡដ្ឋានជាតិមរតកតេជោ នៅថ្ងៃទី៣១ ខែមករា ឆ្នាំ២០២៣ នេះ ។

 

លោកថា ក្រោយពិធីរាប់ថយក្រោយ ១០០ថ្ងៃ កាលពីថ្មីៗ នេះគឺជាពេលវេលាត្រូវរន្ថើន និងពន្លឿនគ្រប់ការងារសេសសល់ ពិសេសភូមិកីឡា ដែលត្រូវជំរុញការសាងសង់ឲ្យបានទាន់ពេលវេលា ។ ភូមិកីឡា នឹងត្រូវទទួលប្រតិភូ និងអត្តពលិកយ៉ាងហោច ៦ពាន់នាក់ ឬមួយថ្ងៃអាចយ៉ាងហោចពី ៤ពាន់ ទៅ ៥ពាន់នាក់ ត្រូវស្នាក់នៅ និងហូបចុកនៅទីនោះ ។ ប៉ុន្ដែបច្ចុប្បន្នទើបដំឡើងបានជាង ១,៨៣០គ្រែ ហើយនៅខែកុម្ភៈ នឹងទទួលបានជាង ២ពាន់គ្រែទៀត និងខែមីនា ដែលជាខែកំណត់ ត្រូវទទួលបានគ្រប់ជាង ៦ពាន់គ្រែ ។

 

ដោយហេតុនេះ ទើបសម្ដេចពិជ័យសេនា ទៀ បាញ់ បានដឹកនាំប្រតិភូ ចុះពិនិត្យទីតាំងជាក់ស្ដែង ទោះបីមានការផ្ដល់សក្ខីកម្មពីតំណាងក្រុមហ៊ុនសាងសង់ និងមើលឃើញសកម្មភាពនៃការវិឌ្ឍន៍មានភាពល្អប្រសើក៏ដោយ ។ អ្វីដែលជាក្ដីបារម្ភ គឺដំណើរការនៃការវិវឌ្ឍន៍នេះ មានភាពយឺតយ៉ាវ ។ លោកសង្កត់ធ្ងន់ថា «សម្ដេចពិជ័យសេនា បានមានប្រសាសន៍ក្នុងអង្គប្រជុំ ឲ្យគណៈកម្មការជំនាញខាងផ្នែកស្នាក់នៅ ហូបចុក ត្រូវត្រួតពិនិត្យរាល់ថ្ងៃ និងឲ្យយោបល់រាល់ថ្ងៃ ថាតើវាខ្វះអ្វី? បើខ្វះមនុស្ស ត្រូវថែមមនុស្សប៉ុន្មាន?» ។

 

«ឥលូវនេះ កម្រិតនៃការយកចិត្តទុកដាក់ និងការតាមដាន និងការជំរុញនេះ ឈានដល់កម្រិតប្រកាសអាសន្ន ដែលសម្ដេចពិជ័យសេនាមានប្រសាសន៍ គឺចូលដល់ប្រកាសអាសន្ន ។ អ៊ីចឹងយើងត្រូវតែរួមគ្នាមកជំរុញការងារឲ្យរួចរាល់ ទាន់ពេលវេលា ។ ប៉ុន្ដែយើងសង្ឃឹមទៅលើការជឿជាក់ ទៅលើក្រុមហ៊ុនដែលបានប្ដេជ្ញាក្នុងការដាក់នូវកម្មវិធីរួចរាល់ នៅត្រឹមថ្ងៃទី៣០ ខែមីនា គឺត្រូវប្រគល់ទាំងអស់មកគណៈកម្មការ CAMSOC ។ សល់ប៉ុន្មានទុកសិន» ។ លោក វ៉ាត់ ចំរើន បន្ថែម ។

 

រដ្ឋលេខាធិការក្រសួងទេសចរណ៍ខាងលើ បន្ដថា ក្រៅពីជំរុញការសាងសង់ភូមិកីឡា សម្រាប់ត្រៀមទទួលបដិសណ្ឋារកិច្ច ប្រកបដោយភាពកក់ក្ដៅ និងសុវត្ថិភាពជូនប្រតិភូកីឡា សម្ដេចពិជ័យសេនា ក៏បានជំរុញការងារសេសសល់ផ្សេងៗ ពិសេសការរៀបចំតុបតែងទីលានប្រកួតទាំងអស់ ត្រូវបញ្ចប់ជាស្ថាពរត្រឹមថ្ងៃទី២៥ ខែមេសា ដ្បិតកីឡាមួយចំនួន ត្រូវចាប់ផ្ដើមការប្រកួតមុន ដូចជាកីឡាបាល់ទាត់ជាដើម ដែលនឹងត្រូវប្រកួតពីថ្ងៃទី២៩ ខែមេសាតទៅ មុនពិធីបើកការប្រកួតកីឡាស៊ីហ្គេម ផ្លូវការ នាថ្ងៃទី០៥ ខែឧសភា ឆ្ការសាងសង់ភូមិកីឡាឈានដល់កម្រិតប្រកាសអាសន្ន, សម្ដេចពិជ័យសេនា ទៀ បាញ់ ជំរុញគណៈកម្មការជំនាញឲ្យតាមដាន និងផ្ដល់យោបល់រាល់ថ្ងៃ ដើម្បីពន្លឿនការសាងសង់ឲ្យបានលឿនបំផុតនាំ២០២៣ ៕

crt

Leave a Reply

Your email address will not be published.