រដ្ឋមន្ត្រីក្រសួងមហាផ្ទៃ ៖ ទោះបីជាអង្គការ FATF ដកកម្ពុជាចេញពីបញ្ជីប្រផេះ តែយើងត្រូវបន្ដប្រឹងប្រែងថែមទៀត
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងប្រាប់ភាគីពាក់ព័ន្ធទាំងអស់មិនត្រូវស្កប់ស្កល់នឹងលទ្ធផលដែលអង្គការ FATF បានដកប្រទេសកម្ពុជាចេញពីបញ្ជីប្រផេះ គឺត្រូវបន្ដខិតខំប្រឹងប្រែងឲ្យកាន់តែខ្លាំងថែមទៀត។
ថ្លែងក្នុងពិធីបិទសន្និបាតបូកសរុបលទ្ធផលការងាររបស់រដ្ឋបាលរាជធានីភ្នំពេញ នារសៀថ្ងៃ ទី១០ ខែមីនា ឆ្នាំ២០២៣ សម្ដេច ស ខេង បានបញ្ជាក់ថា ៖«ទោះបីអង្គការ FATF សម្រេចឲ្យយើងចាកចេញពីបញ្ជីប្រផេះ ប៉ុន្ដែយើងមិនត្រូវស្កប់ស្កល់នឹងលទ្ធផលដែលយើងបានធ្វើនោះទេ យើងត្រូវបន្ដខិតខំប្រឹងប្រែងឲ្យកាន់តែខ្លាំងថែមទៀត ដើម្បីជាការពង្រឹងនូវការជឿទុកចិត្តពីគ្រប់មជ្ឈដ្ឋានដែលមានការពាក់ព័ន្ធទាំងការវិនិយោគក្នុងស្រុក និងការវិនិយោគក្រៅស្រុកក៏ដូចជា ភ្ញៀវទេសចរនានា»។
សម្ដេចក្រឡាហោម បានបន្ដថា គណៈកម្មាធិការប្រយុទ្ធប្រឆាំងការសម្អាតប្រាក់នេះកំពុងតែរៀបចំនូវរបាយការណ៍បូកសរុប និងដកពិសោធន៍ហើយបន្ទាប់ពីនោះទៀតត្រូវធ្វើការប្រជុំ ដើម្បីប្រមូលមតិយោបល់ ឬក៏ធាតុចូលនានាហើយដាក់ចេញវិធានការអនុវត្តបន្ដបន្ទាប់ទៀត ដើម្បីធានាថាធនាគារប្រផេះ ឬក៏ខ្មៅមិនអាចវិលត្រឡប់មកវិញ។
ជាមួយគ្នានោះដែរ សម្ដេច ស ខេង បានណែនាំដល់ភាគីពាក់ព័ន្ធទាំងអស់មិនត្រូវធ្វើឲ្យប៉ះពាល់នាំឲ្យកម្ពុជាធ្លាក់ទៅបញ្ជីប្រផេះវិញ ព្រោះកម្ពុជាបានធ្លាប់ធ្លាក់ម្ដងរួចទៅហើយ ពីស ទៅប្រផេះ ហើយឥឡូវនេះពីប្រផេះមកសវិញហើយ ។
សម្ដេចថា «នេះជាបទពិសោធន៍ដែលយើងឆ្លងកាត់ផងដែរ»។ សម្តេចក្រឡាហោម ស ខេងបានស្នើឲ្យសមត្ថកិច្ចត្រូវបន្តបង្កើនការប្រយុទ្ធប្រឆាំងល្បែងគ្រប់ប្រភេទ និងអំពើជួញដូរមនុស្សគ្រប់ទម្រង់ ។ ត្រូវបង្ការ និងបង្ក្រាបល្បែងស៊ីសងខុសច្បាប់គ្រប់ប្រភេទទាំងល្បែងភ្នាល់តាមប្រព័ន្ធអនឡាញខុសច្បាប់ និងល្បែងស៊ីសងគ្រប់ប្រភេទនៅតាមមូលដ្ឋាន ។
សូមរំលឹកថា ថ្មីៗនេះ អង្គការឃ្លាំមើលការលាងលុយ និងឧក្រិដ្ឋកម្មហិរញ្ញវត្ថុអន្តរជាតិ (FATF) ដែលមានមូលដ្ឋាននៅទីក្រុងប៉ារីស បានប្រកាសជាផ្លូវការ ក្នុងការដកប្រទេសកម្ពុជាចេញពី «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់។ ប្រទេសកម្ពុជា ធ្លាប់ត្រូវបាន អង្គការ FATF ដាក់ឲ្យស្ថិតក្នុង «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់រយៈពេល៤ឆ្នាំជាប់ៗគ្នាចាប់តាំងពីឆ្នាំ២០១៩ មក៕
