ខេត្តកំពង់ឆ្នាំង÷ ប្រសិនបើគិតមកដល់ថ្ងៃទី២៨ ខែមេសា ឆ្នាំ២០២៥ នេះ គឺមានរយៈពេល៧ថ្ងៃហើយ ដែលក្រុមហ៊ុនអានកូទឹកស្អាតក្រុងកំពង់ឆ្នាំង មិនបានកាយដីដែលបានចាក់ចូលទន្លេសាប ដែលស្ថិតនៅចំណុចភូមិទី១ សង្កាត់ខ្សាម និងភូមិចុងកោះ សង្កាត់ផ្សារឆ្នាំង ក្រុង/ខេត្តកំពង់ឆ្នាំងចេញនៅឡើយនោះទេ ដែលករណីនេះ នាំអោយប្រជាពលរដ្ឋសួរនាំច្រើនពាក់ព័ន្ធនឹងនីតិវិធីរបស់ក្រសួងធនធានទឹក, អាជ្ញាធរទន្លេសាប និងអាជ្ញាធរខេត្តកំពង់ឆ្នាំង។
ករណីចាក់ដីចូលទន្លេសាបរាប់រយពាន់ឡាន និងលុបទន្លេជាង៧០ម៉ែត្រ
៊នេះ បានកើតឡើងតាំងអំឡុងខែមីនា និងដើមខែមេសា ឆ្នាំ២០២៥ ដោយមិនមានអ្នកហាមឃាត់នោះទេ គឺរហូតដល់ថ្ងៃទី១៩ ខែមេសា ឆ្នាំ២០២៥(ប្រជុំលើកទី១) ទើបក្រសួងធនធានទឹក អាជ្ញាធរទន្លេសាប, អាជ្ញាធរខេត្តកំពង់ឆ្នាំងបានចុះមកពិនិត្យ និងប្រាប់អោយក្រុមហ៊ុនទឹកស្អាតអានកូក្រុងកំពង់ឆ្នាំង កាយដីចេញពីកន្លែងចាក់ដីចូលទន្លេសាប ហើយនៅថ្ងៃទី២២ ខែមេសា ឆ្នាំ២០២៥ ក្រសួងធនធានទឹក និងអាជ្ញាធរទន្លេសាប បានមកប្រជុំម្តងទៀត(លើកទី២) ដោយខាងក្រុមហ៊ុនសុំរយៈពេល១៥ ដើម្បីកាយដីដែលចាក់ចូលទន្លេសាបចេញវិញអោយស្អាត តែខាងក្រសួងធនធានទឹក អាជ្ញាធរទន្លេសាប និងអាជ្ញាធរខេត្តកំពង់ឆ្នាំង ទុកពេលអោយត្រឹមតែ៧ថ្ងៃប៉ុណ្ណោះក្នុងការកាយយកអាចម៍ដីទាំងអស់ចេញពីទន្លេសាបដែលខ្លួនបានចាក់ចូល។ គឺចាប់ពីថ្ងៃទី២២ ដល់ថ្ងៃទី២៨ ខែមេសា ឆ្នាំ២០២៥នេះ ហើយមានរយៈពេល៧ថ្ងៃហើយ នៅមិនទាន់ឃើញខាងក្រមហ៊ុនទឹកស្អាត បានដាក់គ្រឿងចក្រចូលកាយដីចេញវិញនៅឡើយ។
ពាក់ព័ន្ធនឹងបញ្ហានេះ លោក អឿ សារឿន ប្រធានស្តីទីមន្ទីរធនធានទឹក និងឧតុនិយមខេត្តកំពង់ឆ្នាំង បានអោយដឹងថា÷ក្រុមការងារក្រសួងធនធានទឹក និងឧតុនិយម អាជ្ញាធរទន្លេសាប និងអាជ្ញាធរខេត្តកំពង់ឆ្នាំង នឹងចាត់វិធានការយកគ្រឿងចក្រកាយដីចេញពីទន្លេសាប នៅចំណុចដែលក្រុមហ៊ុនអានកូទឹកស្អាតក្រុងកំពង់ឆ្នាំងបានចាក់ដីចូលដោយខ្លួនឯង ប្រសិនបើខាងក្រុមហ៊ុនមិនបានកាយចេញក្នុងរយៈពេលដែលកំណត់នៅក្នុងកិច្ចប្រជុំថ្ងៃទី២២ ខែមេសា ឆ្នាំ២០២៥នោះទេ ហើយការកាយដីចេញពីទន្លេសាបនេះ នឹងត្រូវគិតតម្លៃកាយ និងចំណាយផ្សេងៗពីក្រុមហ៊ុនទឹកស្អាតអានកូក្រុងកំពង់ឆ្នាំងទាំងអស់។
ប្រជាពលរដ្ឋក្រុង និងខេត្តកំពង់ឆ្នាំង រង់ចាំមើលចំណាត់ការក្តៅរបស់ក្រសួងធនធានទឹក និងឧតុនិយម អាជ្ញាធរទន្លសាប និងអាជ្ញាធរខេត្តកំពង់ឆ្នាំង ក្នុងការប្រើកណ្តាប់ដៃដែកកាយដីដែលក្រុមហ៊ុនទឹកស្អាតអានកូបានចាក់ចូល ចេញពីទន្លេសាបវិញ៕
