សាលាដំបូងរាជធានីភ្នំពេញ នៅព្រឹកថ្ងៃទី០៥ ឧសភា ឆ្នាំ២០២៥នេះ បានបើកសវនាការលើ លោក រ៉ុង ឈុន ពីបទ «ញុះញង់បង្ក ឱ្យមានភាពវឹកវរធ្ងន់ធ្ងរ ដល់សន្តិសុខសង្គម និងបទ មិនរាងចាល» បន្ទាប់ពីការផ្តន្ទាទោសបទមជ្ឈិម ។ ក្រោយបើកសវនាការតុលាការ សម្រេចឱ្យជាប់ពន្ធនាគាររយៈពេល ៤ឆ្នាំ និងដកហូតសិទ្ធិបោះឆ្នោតនិង ឈរឈ្មោះបោះឆ្នោតជាអចិន្ត្រៃយ៍ ។
តុលាការក៏បានពិន័យ លោក រ៉ុង ឈុន ជាប្រាក់ចំនួន៤លានរៀល ។ ការផ្តន្ទាទោសនេះ បន្ទាប់ពី លោក រ៉ុង ឈុន បញ្ចេញមតិមិនពិតទាក់ទងនឹងការបោកប្រាស់ តាមប្រព័ន្ធអ៊ីនធឺណិតនៅកម្ពុជា និងបញ្ហាព្រំដែនកម្ពុជា-វៀតណាម ។
ទីប្រឹក្សាគណបក្សកម្លាំងជាតិលោក រ៉ុង ឈុន បានលើកឡើងថា÷ ការសម្រេចរបស់តុលាការដកហូតសិទ្ធិធ្វើនយោបាយរបស់លោកមួយជីវិត ជារឿងអយុត្តិធម៌ និងជារឿងនយោបាយ មិនមែនជាការអនុវត្តច្បាប់នោះទេ។ លោកបញ្ជាក់ថា÷ លោកនឹងជជែកជាមួយមេធាវី ដើម្បីប្ដឹងទាស់ការសម្រេចនេះ ទៅសាលាឧទ្ធរណ៍ ៕
