កម្លាំងគយចល័ត ចុះបង្ក្រាបទីតាំងលក់ម៉ូតូ គេចពន្ធចំនួន ០៩ទីតាំង ក្នុងភូមិសាស្ត្រស្រុកមេមត់ នៃខេត្តត្បូងឃ្មុំ ដោយរកឃើញម៉ូតូគ្មានពន្ធនាំចូល ចំនួន ១៥១ គ្រឿង

ខេត្តត្បូងឃ្មុំ÷យោងតាមការណែនាំរបស់ លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងមានការចង្អុលបង្ហាញពី លោក នូ ស៊ីថា ប្រធាននាយកដ្ឋានបង្ការ និងបង្រ្កាបបទល្មើស ព្រឹកថ្ងៃទី ២៦ ខែកញ្ញា ឆ្នាំ ២០២៥ កម្លាំងគយចល័ត ដែលដឹកនាំផ្ទាល់ដោយ លោក ព្រាប គារ៉ាត អនុប្រធាននាយកដ្ឋានបង្ការ និងបង្រ្កាបបទល្មើស ដឹកនាំមន្ត្រីក្រោមឱវាទ សហការជាមួយសមត្ថកិច្ចចម្រុះ  ដោយមានការសម្របសម្រួលពី លោក ងិន ពេជ ព្រះរាជអាជ្ញាអមសាលាដំបូងខេត្តត្បូងឃ្មុំ និងចុះដឹកនាំផ្ទាល់ដោយព្រះរាជអាជ្ញារង ០២រូប បានធ្វើការចុះបង្ក្រាបទីតាំង លក់ម៉ូតូគេចពន្ធ ចំនួន ០៩កន្លែង នៅក្នុងភូមិសាស្ត្រ ស្រុកមេមត់ ខេត្តត្បូងឃ្មុំ ដោយបានរុករកឃើញម៉ូតូគ្មានពន្ធនាំចូល ចំនួន ១៥១គ្រឿង និងបានចាប់ឃាត់យកមកអនុវត្ត ទៅតាមនីតិវិធីច្បាប់។  

មន្ត្រីគយមួយរូបដែលចុះ ប្រតិបត្តិការផ្ទាល់បានប្រាប់បណ្តាញសារព័ត៌មានឱ្យដឹងថា÷ មុននឹងឈានទៅដល់ការព័ទ្ធ ចាប់នៅទីតាំងលក់ម៉ូតូខាងលើ អង្គភាពគយបានធ្វើការស្រាវជ្រាវតាមរយ:ចាប់ឃាត់រថយន្ត របស់ ក្រុមហ៊ុន វីរ:ប៊ុនថាំ ដែលបានលួចដឹកម៉ូតូគេចពន្ធចេញពីទីតាំងលក់ម៉ូតូខាងលើ យកទៅរាជធានីភ្នំពេញ ហើយកម្លាំងគយបង្ក្រាបបានកន្លងមក។

ទន្ទឹមនឹងនេះ ក៏មានការលួចដឹកម៉ូតូគេចពន្ធ តាមរយ:រថយន្តដឹកអ្នកដំណើរ ហើយត្រូវបានមន្ត្រីគយចាប់ឃាត់ និងសួរទៅអ្នកបើកបរ បានឆ្លើយសារភាពថា÷ ខ្លួនបានដឹកចេញពីទីតាំងលក់ម៉ូតូខាងលើផងដែរ៕