សម្ដេច ស ខេង ៖ អភិបាលរាជធានី-ខេត្តមួយចំនួនស្ងាត់ដូចចោរ លួចសេះ មិនខ្ចីរាយការណ៍ពាក់ព័ន្ធបណ្ដឹងពលរដ្ឋ
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានប្រកាសស្ដីបន្ទោសអភិបាលរាជធានី-ខេត្ត មួយចំនួនស្ងាត់ដូចចោរលួចសេះ ហើយមិនខ្ចីរាយការណ៍មកក្រសួងមហាផ្ទៃវិញពាក់ព័ន្ធទៅនឹងបណ្ដឹងរបស់ប្រជាពលរដ្ឋ។
សម្ដេច ស ខេង លើកឡើងបែបនេះ ក្រោយពីក្រសួងមហាផ្ទៃទទួលបានពាក្យបណ្ដឹងពីប្រជាពលរដ្ឋ រួចហើយក្រសួងធ្វើលិខិតទៅបណ្ដាខេត្តសាមី ដើម្បីដោះស្រាយជូនប្រជាពលរដ្ឋ។
ថ្លែងក្នុងឱកាសអញ្ជើញបូកសរុបលទ្ធផលនៃអង្គសន្និបាតត្រួតពិនិត្យលទ្ធផលការងារឆ្នាំ២០២២ និងផ្តល់អនុសាសន៍លើកទិសដៅការងារឆ្នាំ២០២៣ របស់ក្រសួងមហាផ្ទៃ នាថ្ងៃទី២៣ ខែកុម្ភៈ ឆ្នាំ២០២៣ សម្ដេច ស ខេង បានស្នើអភិបាលរាជធានី-ខេត្តបន្ដយកចិត្តទុកដាក់ពាក្យបណ្ដឹងសំណើរសំណូមពរ និងការទាមទារនានារបស់ប្រជាពលរដ្ឋ។
សម្ដេចបន្ដថា ក្រសួងមហាផ្ទៃ នាឆ្នាំ២០២២កន្លងទៅទទួលបានសំណើរសំណូមពរសូមអន្ដរាគមន៍នូវពាក្យបណ្ដឹងនានារបស់ប្រជាពលរដ្ឋពាក់ព័ន្ធទៅនឹងដីធ្លីមានរហូតដល់១៤៥ករណីក្នុងរាជធានី-ខេត្ត។ សម្ដេច ស ខេង បានគូសបញ្ជាក់ថា៖«ក្រសួងមហាផ្ទៃបានធ្វើលិខិតបញ្ជូនទៅរាជធានី-ខេត្ត ប៉ុន្ដែមកដល់ពេលបានតែប្រាំរាជធានី-ខេត្តប៉ុណ្ណោះដែលបានឆ្លើយតបមកវិញ ឬក៏ផ្ដល់របាយការណ៍មាន៦ករណី ខេត្តមណ្ឌលគិរី មួយករណី ខេត្តព្រះសីហនុពីរករណី, កោះកុង មួយករណី, សៀមរាបមួយករណី និងស្វាយវៀងមួយករណី។
ប៉ុន្ដែក្រៅពីហ្នឹងស្ងាត់ដូចចោលលួចសេះមិនខ្ចីរាយការណ៍ មិនព្រមធ្វើ មិនព្រមរាយការណ៍ វាម៉េចរឿងហ្នឹង?ឥឡូវសូមពិនិត្យឱ្យខ្ញុំ គ្រប់ខេត្ត ដែលមិនទាន់ដោះស្រាយម៉េចមិនបានយកចិត្តទុកដាក់ដោះស្រាយ?»។
លើសពីនេះ សម្ដេច ឧបនាយករដ្ឋមន្ដ្រី ក៏បានយល់បញ្ហាទាំងនេះ គឺមិនស្រួលឡើយ ប៉ុន្ដែលំបាកយ៉ាងណាក៏ដោយ គឺបញ្ជូនរបាយការណ៍មកក្រសួងវិញហើយបញ្ជាក់មូលហេតុឱ្យបានត្រឹមត្រូវ។សម្ដេចថា តើឧបសគ្គរឿងអ្វី?។ សម្ដេចក៏ណែនាំអភិបាលរាជធានី-ខេត្ត ត្រូវយកចិត្តទុកដាក់ដោះស្រាយជូនប្រជាពលរដ្ឋ។
ជាមួយគ្នានេះ សម្ដេចលើកឡើងថា ដោយឡែកក្នុងឆ្នាំ២០២២ គេហទំព័រហ្វេសប៊ុករបស់សម្ដេចក៏បានទទួលមតិយោបល់ និងសំណូមពរ នានាពាក់ព័ន្ធសមត្ថកិច្ចរបស់ក្រសួងមហាផ្ទៃ និងរដ្ឋបាលថ្នាក់ក្រោមជាតិចំនួនជាង១.៧០០ករណី ក្នុងនោះមានករណីដែលត្រូវដោះស្រាយចំនួនជាង១.៤០០ករណី បានដោះស្រាយឆ្លើយតបរួចចំនួនជាង៨០០ករណី និងមានករណីជាង៣០០ទៀតជាអនុសាសន៍ និងព័ត៌មានល្អៗសម្រាប់អនុវត្តការងារ៕
