ចាប់សាច់បង្កកខូចគុណភាព៨០តោនយកទៅដុតកម្ទេចចោល
រាជធានីភ្នំពេញ ៖ មន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ«ក.ប.ប» បានធ្វើការដុតបំផ្លាញចោលសាច់សត្វស្រស់ បង្កក និងផលិតផលអំពីសត្វ សរុបប្រមាណ៨.១៧២គីឡូក្រាម ។
ការដុតបំផ្លាញចោលនេះ ត្រូវបានរៀបចំឡើងនៅទីលានចាក់សំរាម ស្ថិតនៅសង្កាត់ជើងឯក ខណ្ឌដង្កោ រាជធានីភ្នំពេញ កាលពីព្រឹកថ្ងៃទី២២ ខែកុម្ភៈ ឆ្នាំ២០២៣ ក្រោមការដឹកនាំរបស់ឯកឧត្តម ប៊ុន ចំរើន អគ្គនាយករង នៃអគ្គនាយកដ្ឋាន ក.ប.ប. តំណាងឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប និងលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងផលិតកម្មសត្វ ។
ឯកឧត្តមអគ្គនាយករង ក.ប.ប. បានឲ្យដឹងថា ដោយអនុវត្តតាមអនុសាសន៍ណែនាំរបស់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងដោយមានការបញ្ជាផ្ទាល់ពីលោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប មន្ត្រីស៊ើបអង្កេតនៃអគ្គនាយកដ្ឋាន ក.ប.ប នៃក្រសួងពាណិជ្ជកម្ម សហការជាមួយមន្ត្រីនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានចុះប្រតិបត្តិការត្រួតពិនិត្យទីតាំងស្តុក និងចែកចាយផលិតផលសាច់សត្វស្រស់ ដែលបង្កកជាច្រើនកន្លែងក្នុងភូមិសាស្ត្ររាជធានីភ្នំពេញ ។
ឯកឧត្តម ប៊ុន ចំរើន បានអះអាងថា គោលបំណងនៃការចុះត្រួតពិនិត្យ ត្រូវបានផ្តោតសំខាន់ទៅលើការស្វែងរកនូវវត្តមានសារធាតុគីមីហាមឃាត់ កង្វះអនាម័យ ដែលនាំដល់ការចម្លងចូលនូវបាក់តេរី និងរោគរាតត្បាតផ្សេងៗ និងភាពអនុលោមទៅនឹងបទប្បញ្ញត្តិបច្ចេកទេសជាធរមាន ពាក់ព័ន្ធនឹងលក្ខខណ្ឌតម្រូវនៃការវេចខ្ចប់ ដឹកជញ្ជូន និងស្តុកទុក សាច់ស្រស់ ឬបង្កក និងផលិតផលសាច់ ។
លោក ហេង មាលី ប្រធានសាខា ក.ប.ប រាជធានីភ្នំពេញបានឲ្យដឹងថា ផលិតផលខូចគុណភាព គ្មានសុវត្ថិភាព សម្រាប់អ្នកប្រើប្រាស់ នាំយកមកបំផ្លាញចោលនាពេលនេះ ត្រូវបានមន្ត្រីជំនាញសាខា ក.ប.ប. រាជធានីភ្នំពេញបង្ក្រាបបាន ក្នុងប្រតិបត្តិការចុះត្រួតពិនិត្យតាមបណ្តាឃ្លាំងស្តុកសាច់ស្រស់ និងបង្កកនៅរាជធានីភ្នំពេញ ក្នុងរយៈពេលកន្លងមក រួមមាន៖ បេះដូងជ្រូក២៤៥កេស ស្មើនឹង១.៣១១គីឡូក្រាម អណ្តាតជ្រូក៤៣៦កេស ស្មើនឹង២.៣៣៣គីឡូក្រាម ជង្គង់មាន់២១៧កេស ស្មើនឹង២.១៧០គីឡូក្រាម សត្វត្រីបង្កក១០៨ថង់ ស្មើនឹង៩៧២គីឡូក្រាម សត្វទាបង្កក១៩៥ថង់ ស្មើនឹង១.៣៨៦គីឡូក្រាម ។
សូមបញ្ជាក់ថា បន្ទាប់ពីទទួលបានលិខិតលេខ៤៣៨ សហវ.គសហ ចុះថ្ងៃទី២៤ ខែមករា ឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ ស្តីពីសំណើចូលរួមសហការអនុវត្តវិធានការត្រួតនិត្យសាច់ស្រស់ និងបង្កក ពិសេសសាច់ និងផលិតផលពីសត្វជ្រូក ដើម្បីត្រួតពិនិត្យនូវហានិភ័យ នៃជំងឺឆ្លងផ្សេងៗ ឯកឧត្តម ផាន អូន បានដាក់បទបញ្ជាដល់មន្ត្រីក្រោមឱវាទរបស់ខ្លួន ឲ្យបង្កើនសកម្មភាពចុះតាមដាន ស្រាវជ្រាវ ត្រួតពិនិត្យ និងបង្ក្រាបនូវរាល់ទីតាំង និងមធ្យោបាយដឹកជញ្ជូន និងតម្រូវឲ្យប្រតិបត្តិករ អាជីវកម្មនាំចូល ចែកចាយ ផលិតផល សាច់សត្វស្រស់ បង្កក និងផលិតផលអំពីសត្វ ត្រូវបង្ហាញលិខិតអនុញ្ញាតពីស្ថាប័នពាក់ព័ន្ធ ដោយមានភ្ជាប់នូវវិញ្ញាបនបត្របញ្ជាក់គុណភាពពីប្រទេសនាំចេញ និងត្រូវគោរព និងអនុវត្តនូវលក្ខខណ្ឌតម្រូវនៃការវេចខ្ចប់ និងដឹកជញ្ជូន ស្តុកទុក រួមទាំងភាពអនុលោមទៅតាមបទប្បញ្ញត្តិជាធរមានផ្សេងទៀត ។
មុននេះ មានការរកឃើញសាច់ជ្រូកមានជំងឺប៉េស្តអាហ្វ្រិកគួរឱ្យខ្លាច ត្រូវបានដុតបំផ្លាញចោល ។ តែអ្វីដែលជាការបារម្ភនោះ សាច់បង្កក ឬកូនជ្រូកតូចៗ ដែលបន្លំធ្វើជាជ្រូកកណ្ដុរអាំង កំពុងត្រូវបានក្លាយជាម្ហូបលើតុមង្គលការនានា តើសុវត្ថិភាពអ្នកបរិភោគនឹងទៅជាបែបណា ? ប្រសិនបើចាប់ដុតបំផ្លាញយូរៗម្ដងបែបនេះ ?
ប៉ុន្តែក៏ជាសំណាងដែរ ព្រោះបានរកឃើញ និងដុតចោលទាន់ពេលវេលា ។ ពេលនេះជាវដូវមង្គលការ ប្រសិនបើរកមិនឃើញទេ សាច់ខាងលើនេះ សង្ស័យផ្លោងចូលរោងការមិនខានឡើយ ៕
