អាជ្ញាធរជាតិអប្សរា ៖ សត្វស្វាកំពុងបង្កហានិភ័យដល់ភ្ញៀវទេសចរ និងសំណូមឱ្យបញ្ឈប់ផ្តល់ចំណី
ខេត្តសៀមរាប ៖ អាជ្ញាធរជាតិអប្សរាបានបញ្ជាក់ថា សត្វស្វានៅតំបន់អង្គរបង្កហានិភ័យដល់ភ្ញៀវទេសចរណ៍ និង តាមប្រាសាទ សូមសំណូមពរដល់ឱ្យសាធារណជនទាំងអស់មេត្តាបញ្ឈប់ផ្តល់ចំណី ដើម្បីថតផ្តិតយករូបភាពសត្វស្វាយកទៅធ្វើអាជីវកម្មខ្លួនឯង ។
គួរបញ្ជាក់ផងដែរថា បើតាមបណ្ដាញទំនាក់ទំនងសង្គមផ្លូវការរបស់អាជ្ញាធរជាតិអប្សរា បានបញ្ជាក់ថា ចំនួនសត្វស្វារស់នៅតំបន់រមណីយដ្ឋានអង្គរ មានការកើនឡើងគួរឱ្យកត់សម្គាល់ ជាមួយនឹងការផ្លាស់ប្ដូរជីវិតបែបធម្មជាតិពីស្វាព្រៃមកជាស្វាស្រុក ដែលហាក់មានភាពសុំាជាមួយមនុស្ស។ ពួកវាលែងចូលព្រៃ ដើម្បីស្វែងរកចំណីទៀតហើយ គឺរង់ចាំចំណីពីមនុស្ស និងពេលខ្លះឆក់ចំណីពីភ្ញៀវទេសចរ ដែលបង្កហានិភ័យផ្សេងៗ។
បើតាមប្រសាសន៍របស់លោក ឡេក គិមលីន ប្រធានភ្នាក់ងារទេសចរណ៍ប្រចាំប្រាសាទអង្គរវត្ត បានឱ្យដឹងនៅថ្ងៃទី២៧ កុម្ភៈ នេះថា ចំនួនសត្វស្វានៅប្រាសាទអង្គរវត្តមានការកើនឡើងនារយៈពេលមួយឆ្នាំចុងក្រោយនេះ។ សត្វស្វាទាំងនោះបានបង្កការរំខានដល់ភ្ញៀវទេសចរស្ទើររៀងរាល់ថ្ងៃ និងមានពេលខ្លះបានខាំភ្ញៀវផងដែរ ។ លោក ឡេក គិម លីន បញ្ជាក់ពីមូលហេតុថា សត្វស្វាខាំភ្ញៀវនោះនៅពេលវាដណ្ដើមឥវ៉ាន់ពីភ្ញៀវ ហើយដណ្តើមមិនបានខាំតែម្តង។ ក្រៅពីនោះ សត្វស្វាក៏បានកកាយរកចំណីតាមធុងសំរាម ដែលធ្វើឱ្យប៉ះពាល់ដល់អនាម័យ បរិស្ថានផងដែរ។
ជាក់ស្តែង នៅតំបន់ក្រុងអង្គរធំឯណោះវិញ សត្វស្វាក៏កំពុងបង្កការរំខាន និងហានិភ័យដល់ភ្ញៀវទេសចរ ក៏ដូចជាថ្មប្រាសាទផងដែរ។
លោក សៀន បណ្ឌិត ប្រធានក្រុមភ្នាក់ងារទេសចរណ៍ប្រចាំក្រុងអង្គរធំ ប្រាប់ឱ្យដឹងថា តាមការអង្កេតពីក្រុមការងាររបស់លោក សត្វស្វានៅតំបន់អង្គរធំអាចមានរាប់រយក្បាល។ ពួកសត្វស្វាទៅខាំភ្ញៀវទាញរបស់របរភ្ញៀវ ទាញទូរស័ព្ទ ទាញកាបូប ប្រតោងលើប្រាសាទធ្វើឱ្យខូចខាតបរិក្ខារទេសចរណ៍ និងជ្រុះថ្មមកក្រោម។ ក្រៅពីនេះ សត្វស្វាដែលតែងមានចរិតរពឹស បានតោងរថយន្ត និងធ្វើឱ្យបាក់កញ្ចក់ និងបាក់ផ្លិតទឹករថយន្ត។
អាជ្ញាធរជាតិអប្សរា សូមសំណូមពរឱ្យសាធារណជនទាំងអស់បញ្ឈប់ផ្តល់ចំណី ដើម្បីថតរូបភាពសត្វស្វាយកទៅធ្វើអាជីវកម្ម ឬក៏ផ្តល់ចំណីដល់សត្វស្វា ដើម្បីឱ្យស្វាទាំងនោះរស់នៅបែបធម្មជាតិ និងមិនរំពឹងលើការឱ្យចំណីដោយមនុស្សឡើយ៕
