សម្តេចតេជោ លើកទឹកចិត្តដល់ពលរដ្ឋចិញ្ចឹមសត្វជិតផុតពូជសម្រាប់ភ្ញៀវទេសចរទស្សនា
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានលើកទឹកចិត្តដល់ប្រជាពលរដ្ឋចិញ្ចឹមសត្វកម្រជិតផុតពូជសម្រាប់ភ្ញៀវទេសចរទស្សនា ដើម្បីទទួលកម្រៃពីទេសចរណ៍ផងដែរ។
ការលើកទឹកចិត្តនេះ សម្តេចក៏បានស្នើឲ្យអ្នកច្បាប់ធ្វើសិក្សាច្បាប់ដែលពាក់ព័ន្ធហើយចែងហាមប្រជាពលរដ្ឋចិញ្ចឹមសត្វកម្រកជិតផុតពូជដើម្បីវិសោធនកម្មចំណុចនោះបើកឲ្យប្រជាពលរដ្ឋចិញ្ចឹមវិញ។
ថ្លែងក្នុងពិធីសម្ពោធដាក់ឱ្យប្រើប្រាស់អគារសិក្សាចំនួន២ខ្នង និងប្រគល់សញ្ញាបត្រជូននិស្សិតនៃវិទ្យាស្ថានបច្ចេកវិទ្យាកម្ពុជាជិត៥ពាន់នាក់ នាថ្ងៃទី១ ខែមីនា ឆ្នាំ២០២៣ សម្ដេចតេជោ ហ៊ុន សែន បានណែនាំដល់ប្រជាពលរដ្ឋចិញ្ចឹមសត្វដែលជិតផុតពូជជាជាងទៅចាប់យកសត្វដែលប្រជាពលរដ្ឋខំចិញ្ចឹមមកទុក។សម្ដេចបានលើកឡើងថា បើយកទោសចំពោះអ្នកចិញ្ចឹមសត្វក្ងោកនោះអ្នកមានទោសមុនគេ គឺសម្តេចបន្ទាប់មកលោក ហ៊ុន ម៉ានិត, លោក ហ៊ុន តូ និងលោកស្រី ហ៊ុន ម៉ាលីស តែម្តង។
សម្ដេចតេជោ បញ្ជាក់ថា «ប្រភពសត្វជិតផុតពូជនេះ គឺយើងបកពីការរឹតត្បិតឲ្យទៅជាចលនាចញ្ចឹមសត្វដែលជិតផុតពូជនេះព្រោះអាហ្នឹងអត់មានខាតអីទាល់តែសោះ ហើយចញ្ចឹម ដើម្បីយកសាច់ យកសាច់ទៅធ្វើអី អាណាស៊ីសាច់ក្ងោក។នាំគ្នាចិញ្ចឹម ហើយប្រជាពលរដ្ឋអាចដាក់ទីតាំងមួយសម្រាប់មើលរបស់ប្រជាជន ហើយអាចទទួលកម្រៃពីទេសចរណ៍ដែលចង់មើល។ខ្ញុំចង់បង្វែរប្រជាពលរដ្ឋរបស់យើងចិញ្ចឹមសត្វដែលជិតផុតពូជទៅវិញ»។
លើសពីនេះសម្ដេច នាយករដ្ឋមន្ដ្រីក៏មិនបន្ទោសមន្ត្រីអនុវត្តន៍ច្បាប់ រឿងចាប់យកសត្វក្ងោកអ្នកភូមិចិញ្ចឹមឡើយប្រហែលជាមន្ត្រីអនុវត្តន៍ច្បាប់សំអាងលើហេតុផលដែលមាននៅក្នុងច្បាប់។ចំណុចនេះ សម្តេច បញ្ជាក់ទៀតថា «បើមានមាត្រាណាមួយនិយាយអំពីការរឹតត្បឹតនេះ សូមធ្វើការកែប្រែ ឬវិសោធនកម្មច្បាប់ត្រង់មាត្រានោះតែម្តង»។
សម្ដេចក៏បានណែនាំឱ្យពិនិត្យបន្ទាន់លើបញ្ហាច្បាប់ ដែលពាក់ព័ន្ធសត្វព្រៃ ដើម្បីបង្កើតសត្វព្រៃឡើងវិញ។ សម្ដេចថា សត្វនេះអាចចិញ្ចឹម ហើយអាចយកទៅលែងនៅក្នុងព្រៃឡើងវិញ។សត្វក្ងោក និងសត្វកម្រផ្សេងទៀតបើងាយចិញ្ចឹមត្រូវបន្តចិញ្ចឹម ហើយលែងទៅព្រៃ ខណៈសកម្មភាពនេះបង្ហាញពីស្ថានភាពល្អនៃការអភិរក្សសត្វព្រៃនៅកម្ពុជាឡើងវិញ។
ពាក់ព័ន្ធគ្រួសារដែលចិញ្ចឹមក្ងោកនោះត្រូវសម្តេចថា សម្តេចបានផ្តល់ថវិការ១០លាន រៀល ដើម្បីឲ្យពួកយកទៅធ្វើការសម្រួលកន្លែងចិញ្ចឹមសត្វក្ងោក ដើម្បីឲ្យប្រជាពលរដ្ឋទៅទស្សនាមានភាពងាយស្រួលផងដែរ។
ជាងនេះទៅទៀត សម្ដេចតេជោ ហ៊ុន សែន បានលើកឡើងថា កន្លែងចញ្ចឹមសត្វព្រៃនៅភ្នំតាម៉ៅមិនប្រាកដថា«ចញ្ចឹមរស់ឡើយ» ដូច្នេះការអនុវត្តន៍ច្បាប់ទាំងឡាយគួរមានភាពវៃឆ្លាតបន្តិច។ក្នុងឱកាសនោះដែរសម្តេចតេជោ ក៏បានលើកឡើងថា នៅពេលក្រុមអ្នកច្បាប់ពិនិត្យសិក្សាច្បាប់ដែលពាក់ព័ន្ធករណីចិញ្ចឹមសត្វនេះហើយដាក់ទៅគណៈរដ្ឋមន្ត្រីដើម្បីបើកសម័យប្រជុំអនុម័ត ពោល គឺប្រជុំតែប៉ុន្មានម៉ោងអនុម័តរួច និងដាក់ទៅរដ្ឋសភាបើកសម័យប្រជុំ និងព្រឹទ្ធសភាបើកសម័យប្រជុំ។ហើយបើសិនមានការពាក់ព័ន្ធអនុក្រឹត្យទៀត សម្តេចនឹងធ្វើការពិនិត្យ កែសម្រួលតែប៉ុន្មាននាទីចប់ហើយ។
សូមជម្រាបថា កាលពីថ្ងៃទី២៨ ខែកុម្ភៈ ឆ្នាំ២០២៣ សម្ដេចតេជោ ហ៊ុន សែន បានចេញបទបញ្ជាបន្ទាន់ឲ្យមន្ដ្រីក្រសួងកសិកម្ម រុក្ខាប្រមាញ់ និងនេសាទ ដែលចុះទៅចាប់សត្វក្ងោក នៅផ្ទះប្រជាពលរដ្ឋ ក្នុងស្រុកបរិបូរណ៍ ខេត្តកំពង់ឆ្នាំងយកទៅប្រគល់ជូនដល់ម្ចាស់គេវិញ។ ការដាក់បទបញ្ជារបស់សម្ដេចធ្វើឡើងបន្ទាប់ពីសម្ដេចទទួលបានសំណូមពរពីមជ្ឈដ្ឋាននានាក្រោយមន្ដ្រីរដ្ឋបាលព្រៃឈើចុះទៅចាប់សត្វក្ងោករបស់ប្រជាពលរដ្ឋ ដែលចិញ្ចឹមលក្ខណៈគ្រួសារក្នុងស្រុកបរិបូរណ៍៕
