រវល់ជាប់ពន្ធនាគារ១៤ឆ្នាំ… ដីកម្មសិទ្ធិត្រូវបានគេនាំគ្នាដណ្ដើមយក
ខេត្តកោះកុង ៖ ដឹងថា ម្ចាស់ដីជាប់ពន្ធនាគារ១៥ឆ្នាំ មានមន្ត្រីខិលខូចជាច្រើននាក់បានចូលរំលោ.ភយកដីចែកគ្នាលក់ ពេលនេះអង្គភាព ACU និងក្រសួងរៀបចំដែនដី កំពុងមានចំណាត់ការស្រាវជ្រាវប្រវត្តិដី និងផ្អាកការចេញប្លង់រឹងសិន។ បុរសម្នាក់ឈ្មោះ ប៉ាក ម៉ាប់ អាយុ៥៥ឆ្នាំ នៅអំឡុងឆ្នាំ១៩៨៧ មានមុខរបរជាអ្នករកស៊ីទិញឈើខ្លឹមច័ន្ទគ្រឹស្នាផង និងធ្វើស្រែចម្ការផង ក្នុងនោះមានដូងជិត៧០០ដើម ត្នោត និងចន្ទីរាប់សិបដើម និងបន្លែបង្ការជាច្រើនមុខទៀត រស់នៅអាស្រ័យផលនៅលើផ្ទៃដីចំនួន ៤៤,៤ ហិកតា ស្ថិតក្នុងភូមិព្រែកស្វាយ សង្កាត់ស្ទឹងវែង ក្រុងខេមរៈភូមិន្ទ ខេត្តកោះកុង ហើយបានធ្វើឯកសារកាន់កា.ប់ដីក្នុងឆ្នាំ១៩៩២ ដែលមានប្លង់កាន់កា.ប់ចំនួន៧ប្លង់ ចេញដោយអាជ្ញាធរឃុំ និងមានមេភូមិ ចូលរួមវាស់វែង ព្រមទាំងសាក្សី ជាច្រើននាក់ កំពុងរស់នៅសព្វថ្ងៃទៀតផង។
លោក ប៉ាក ម៉ាប់ បានបញ្ជាក់ថា នៅដើមខែឧសភា ឆ្នាំ២០០៤ រូបលោកត្រូវបានតុលាការចេញដីកាឆែកឆេរ និងឃាត់ខ្លួនរូបលោក ដោយចោទពីបទប្រើប្រាស់អាវុធខុសច្បាប់ ប៉ុន្តែក្នុងពេលឆែកឆេររកមិនឃើញមានអាវុធទេ ព្រោះខ្ញុំមិនធ្លាប់មានអាវុធប្រើឡើយ។ រយៈពេល៤ទៅ៥ថ្ងៃក្រោយមក រូបខ្ញុំត្រូវបានតុលាការកោះហៅម្តងទៀត ដោយចោទពីបទអំពើភេរវៈកម្មវិញម្តង និងត្រូវបានតុលាការចេញសាលក្រមផ្តន្ទាទោសអោយជាប់ពន្ធនាគាររយៈពេល១៥ឆ្នាំ ។ ប៉ុន្តែដោយមានការសម្រាលទោស១ឆ្នាំ រូបខ្ញុំត្រូវជាប់ទោសតែ១៤ឆ្នាំប៉ុណ្ណោះ ចាប់ពីថ្ងៃទី០៥ខែឧសភា ឆ្នាំ២០០៤ រហូតដល់ថ្ងៃទី០៥ ខែឧសភា ឆ្នាំ២០១៨។
លោកបញ្ជាក់បន្តថា ក្នុងអំឡុងពេលដែលរូបខ្ញុំត្រូវបានតុលាការចាប់ខ្លួន ប្រពន្ធរបស់ខ្ញុំនិងកូនៗចំនួន៥នាក់ ត្រូវបានចាកចេញពីផ្ទះ ហើយធ្វើចំណាកស្រុកទៅរស់នៅប្រទេសថៃ ដោយបោះបង់ទាំងផ្ទះសម្បែង ទ្រព្យសម្បត្តិក្នុងផ្ទះ ប្លង់កាន់កា.ប់ដី និងដីស្រែចម្ការទាំងអស់គ្មានអ្នកមើលថែរយៈពេល១៤ឆ្នាំដែរ។ ហេតុនេះ ទើបមន្ត្រីរាជការក្នុងខេត្ត ដែលធ្លាប់ស្គាល់ខ្ញុំស្និទ្ធស្នាលឆ្លៀតឱកាសចូលកាន់កា.ប់លើទីតាំងដីរបស់ខ្ញុំបាទទាំងមូលតែម្តង។ បន្ទាប់ពីរូបខ្ញុំត្រូវបានចេញពីពន្ធនាគារវិញ ខ្ញុំក៏បានមកសង់ផ្ទះរស់នៅលើដីភូមិចាស់របស់ខ្ញុំវិញ ជាហេតុធ្វើអោយមន្ត្រីរាជការមួយចំនួនធំបញ្ចេញប្រតិកម្មមកលើរូបខ្ញុំ ដោយចោទរូបខ្ញុំថា បានចូលរំលោ.ភយកដីរបស់ពួកគេទៅវិញ និងមានមន្ត្រីខ្លះបានដាក់ពាក្យប្តឹង និងចេញមុខគំរា.មដោយអាវុធមកលើរូបខ្ញុំទៀតផង។
លោក ប៉ាក ម៉ាប់ បានបញ្ជាក់បន្ថែមថា ដោយអាជ្ញាធរមូលដ្ឋានបានស្ថាបនាផ្លូវថ្មីមួយខ្សែឈ្មោះថា «ផ្លូវសេរីការ» ដើម្បីកំណត់ព្រំប្រទល់ភូមិ ហើយផ្លូវនេះ ត្រូវពុះចែកដីរបស់ខ្ញុំបាទជាពីរភូមិ ៖
ទី១- ស្ថិតនៅក្នុងភូមិ១ សង្កាត់ស្មាច់មានជ័យ មានទំហំ១៦,៤ហិកតា ។ ទីតាំងនេះ មានមន្ត្រីធំៗចំនួន៩រូប បានទិញ.តពីអ្នកលក់ ទី២ ឬទី៣ ហើយពេលនេះ ក្រសួងរៀបចំដែនដីនគរូបនីយ៍កម្មសំណង់ និងសុរិយោដី បានចេញលិខិតជូនដំណឹងរួចហើយកាលពីថ្ងៃទី២២ ខែមេសា ឆ្នាំ២០២២ បង្គាប់អោយលោកប្រធានមន្ទីររៀបចំដែនដីនគរូបនីយ៍កម្មសំណង់ និងសុរិយោដីខេត្ត ផ្អាកការចេញប័ណ្ណសម្គាល់ម្ចាស់អចលនៈវត្ថុ និងស្រាវជ្រាវសាវតាដីឡើងវិញ។
ទីតាំងទី២ មានទំហំ២៨ហិកតា ស្ថិតនៅភូមិព្រែកស្វាយ សង្កាត់ស្ទឹងវែង ក្រុងខេមរៈភូមិន្ទ ជាទីតាំងដែលខ្ញុំកំពុងរស់នៅសព្វថ្ងៃ ហើយមានឈ្មោះ សុខ ហុង ចេញមុខប្តឹង និងមានលោកផ្កាយ២ យិន លីម ចេញមុខគំរា.មអោយខ្ញុំចាកចេញពីទីតាំងនេះ តែត្រូវបានលោកព្រះរាជអាជ្ញា រស់ សារាំ ចេញដីកាតម្កល់រឿងអត់ចាត់ការ។
ក្រៅពីនេះ អង្គភាពប្រឆាំងអំពើពុករលួយ ACU ក៏បានចេញលិខិតជម្រាបជូនរួចហើយ កាលពីថ្ងៃទី០៤ ខែសីហា ឆ្នាំ២០២០ តាមការស្នើសុំរបស់ខ្ញុំបាទ ហើយលិខិតជម្រាបជូននោះ មួយច្បាប់ជម្រាបជូនទៅលោក កាយ ក្រុង ចៅសង្កាត់ស្ទឹងវែង ក្រុងខេមរៈភូមិន្ទ ខេត្តកោះកុង បំភ្លឺពីប្រវត្តិកាន់កា.ប់ដីខាងលើតាំងពីឆ្នាំ១៩៨៧ រហូតមកដល់បច្ចុប្បន្ន និងផ្តល់ឯកសារពាក់ព័ន្ធមកអង្គភាព ACU អោយបានទាន់ពេលវេលា ដើម្បី ACU មានមូលដ្ឋានបន្តនីតិវិធី។ នឹងមួយច្បាប់ទៀត ជម្រាបជូនទៅលោក មីន មករា ប្រធានសាលាដំបូងខេត្តកោះកុង ធ្វើរបាយការណ៍អំពីទំនាក់ទំនង និងចេតនារវាងលោក អ៊ង ស៊ឹងទ្រី ក្រឡាបញ្ជី និងលោកឧត្តមសេនីយ៍ទោ យិន លីម ខណៈពេលដែលខ្លួន (ក្រឡាបញ្ជី) កំពុងសាកសួរឈ្មោះ ប៉ាក ម៉ាប់ ចូលឆ្លើយតាមការកោះហៅរបស់លោកព្រះរាជអាជ្ញា រស់ សារាំ ហើយបើកសម្លេងគំរា.មតាមទូរស័ព្ទរបស់លោក យិន លីម អោយលោកប៉ាក ម៉ាប់ស្តាប់ ។ ហើយ ACU តម្រូវអោយលោកប្រធានសាលាដំបូងខេត្តកោះកុង បំភ្លឺករណីនេះ និងផ្តល់ឯកសារពាក់ព័ន្ធនឹងសំណុំរឿងខាងលើមក ACU អោយបានទាន់ពេលវេលា ដើម្បី ACU មានមូលដ្ឋានបន្តនិតិវិធី។
លោក ប៉ាក ម៉ាប់ បានបញ្ជាក់ចុងក្រោយថា លោកពិតជាមានការជឿជាក់យ៉ាងមុតមាំទៅលើស្ថាប័នសាលាដំបូងខេត្តកោះកុង ក្រសួងរៀបចំដែនដីនគរូបនីយ៍កម្មសំណង់ និងសុរិយោដី និងអង្គភាពប្រឆាំងអំពើពុករលួយ ដែលបានបើកប្រតិបត្តិការស្រាវជ្រាវរកសាវតាអ្នកកាន់កា.ប់ដីពិតប្រាកដយ៉ាងច្បាស់លាស់ និងយុត្តិធម៌៕