ឡានសាំយ៉ុងដឹកថ្នាំពេទ្យត្រូវមន្ត្រីគយ២ខេត្តចាប់ជាបន្តបន្ទាប់គ្នា មិនដឹងមូលហេតុអ្វី?
ខេត្តព្រៃវែង ៖ ថ្នាំពេទ្យជាច្រើនប្រភេទដឹកតាមរថយន្តសាំយ៉ុង ក៏ត្រូវបានកម្លាំងជំនាញគយ និងរដ្ឋាករសាខាខេត្តព្រៃវែងធ្វើការចាប់ឃាត់យកទៅត្រួតពិនិត្យដោយសង្ស័យថា «ជាទំនិញគេចពន្ធ» ។ ការចាប់ឃាត់រថយន្តសាំយ៉ុងនេះ បានធ្វើឡើងកាលពីវេលាម៉ោង២រសៀលថ្ងៃទី៨ មីនា ស្ថិតនៅលើកំណាត់ផ្លូវជាតិលេខ១ ត្រង់ចំណុចឃុំល្វា ស្រុកព្រះស្តេច ខេត្តព្រៃវែង ។
ក្រោយចាប់ឃាត់ អ្នកបើកបររថយន្តបានរត់គេចខ្លួនបាត់ បន្សល់ទុកតែរថយន្តជាប្រភេទរថយន្តសាំយ៉ុងពណ៌ស ពាក់ស្លាកលេខ ២AM ៩៥១៩ ហើយនៅក្នុងរថយន្តមានផ្ទុកថ្នាំពេទ្យដែលវេចខ្ចប់ក្នុងកេះបារីពេញមួយរថយន្តតែម្តង ។ ប៉ុន្តែអ្វីដែលគេកំពុងតែចាប់អារម្មណ៌ខ្លាំងនោះ គឺក្រោយមន្ត្រីជំនាញគយ និងរដ្ឋាករសាខាខេត្តព្រៃវែង ចាប់ឃាត់រថយន្តសាំយ៉ុងដឹកថ្នាំពេទ្យនោះ បានតែមួយថ្ងៃមួយយប់ គឺនៅវេលាម៉ោង៧យប់ថ្ងៃទី៩ មីនា រថយន្តសាំយ៉ុង រួមជាមួយថ្នាំពេទ្យមួយរថយន្តនោះ ក៏ត្រូវបានដោះលែងវិញ ហើយម្ចាស់រថយន្តក៏បានបន្តដឹកថ្នាំពេទ្យទាំងនោះតាមកំណាត់ផ្លូវជាតិលេខ១ ឆ្ពោះទៅកាន់ខេត្តស្វាយរៀងបន្តទៀត ពេលចូលដល់ក្នុងទឹកដីខេត្តស្វាយរៀង រថយន្តសាំយ៉ុងនេះក៏ត្រូវបានមន្ត្រីជំនាញគយនិងរដ្ឋាករសាខាខេត្តស្វាយរៀងចាប់ឃាត់ទៀត។
ជុំវិញការចាប់ឃាត់រថយន្តសាំយ៉ុងដឹកថ្នាំពេទ្យនេះ ត្រូវបានលោក មួង ដារ៉ា ប្រធានសាខាគយ
និងរដ្ឋាករខេត្តព្រៃវែងអះអាងថា កំលាំងរបស់លោកចាប់ឃាត់រថយន្តសាំយ៉ុងនេះ គឺដោយសារសង្ស័យថា រថយន្តនេះលួចដឹកម៉ូតូគេចពន្ធ ប៉ុន្តែពេលឃាត់បានហើយឆែកត្រួតពិនិត្យក្នុងរថយន្តទៅ មិនឃើញមានម៉ូតូគេចពន្ធ បែរជាឃើញសុទ្ធតែថ្នាំពេទ្យ ហើយថ្នាំពេទ្យទាំងអស់នោះសុទ្ធតែមានពន្ធត្រឹមត្រូវថែមទៀត ទើបលោកបញ្ជាអោយកូនចៅដោះលែងទៅវិញទៅ ប៉ុន្តែក្នុងការដោះលែងនេះ មានការផាកពិន័យឬអត់នោះ លោក មួង ដារ៉ា មិនបានធ្វើការបកស្រាយនោះទេ ។
យោងតាមប្រភពព័ត៌មានពីសមត្ថកិច្ចខេត្តព្រៃវែងបានអោយដឹងថា រថយន្តសាំយ៉ុងដឹកថ្នាំពេទ្យនោះ ក្រោយពីមន្ត្រីជំនាញគយនិងរដ្ឋាករសាខាខេត្តព្រៃវែងដោះលែងហើយនោះ បានធ្វើដំណើរបន្តទៅដល់ខេត្តស្វាយរៀង ហើយក៏ត្រូវបានមន្ត្រីជំនាញគយនិងរដ្ឋាករសាខាខេត្តស្វាយរៀងចាប់ឃាត់ទៀត ដោយចាប់ឃាត់នៅវេលាម៉ោង៩និង១០នាទី ថ្ងៃទី៩ មីនា ថ្ងៃដដែលនោះ នៅលើកំណាត់ផ្លូវជាតិលេខ១ ត្រង់ចំណុចខាងមុខវិទ្យាល័យ ហ៊ុន សែន ចេក ក្នុងសង្កាត់ចេក ក្រុងស្វាយរៀង ប៉ុន្តែគេមិនបានដឹងថា តើមន្ត្រីជំនាញគយនិងរដ្ឋាករខេត្តស្វាយរៀង ចាប់ឃាត់រថយន្តនេះដោយសារមូលហេតុអ្វីទៀតនោះទេ ហើយពេលនេះទាំងរថយន្តនិងថ្នាំពេទ្យទាំងអស់ ត្រូវបានឃាត់ទុកនៅស្នាក់ការគយនិងរដ្ឋាករសាខាខេត្តស្វាយរៀងនៅឡើយ ។
ដោយឡែក ចំពោះការដឹកជញ្ជូនថ្នាំពេទ្យទាំងនេះ ត្រូវបានមន្ត្រីជំនាញសុខាភិបាលខេត្តព្រៃវែងបញ្ជាក់អោយដឹងថា ថ្នាំពេទ្យជាទំនិញដែលងាយនឹងខូចគុណភាពណាស់ ដូច្នេះការដឹកជញ្ជូនត្រូវវិចខ្ចប់អោយបានត្រឹមត្រូវ ក្នុងសីតុណ្ហភាពដែលសមស្រប និងត្រូវមានប្រភពច្បាស់លាស់ផងដែរ ប៉ុន្តែសំរាប់ថ្នាំពេទ្យដែលដឹកតាមរថយន្តសាំយ៉ុងនេះ គឺមិនបានអនុលោមទៅតាមស្តង់ដារបច្ចេកទេសសុខាភិបាលទេ ប៉ុន្តែមន្ត្រីជំនាញសុខាភិបាលក៏មិនមានសិទ្ធិចាប់ឃាត់រថយន្តនោះដែរ គឺមានសិទ្ធិត្រួតពិនិត្យតែនៅតាមគ្លីនិកនិងកន្លែងលក់ថ្នាំពេទ្យ (ហ្វាម៉ាស៊ី) ប៉ុណ្ណោះ។