រាជធានីភ្នំពេញ ៖ សម្តេចតេជោ ហ៊ុន សែន នាយរដ្ឋមន្ត្រី បានប្រកាសជាផ្លូវការថា មានតែគណបក្សប្រជាជនកម្ពុជា (CPP) តែមួយប៉ុណ្ណោះ ដែលជានិមិត្តរូប នៃការផ្លាស់ប្តូរនៅក្នុងប្រទេសកម្ពុជា ដែលមើលឃើញភាពជាក់ស្តែង។ ការប្រកាសរបស់សម្តេចតេជោ ហ៊ុន សែននេះ បន្ទាប់ពីក្រុមប្រឆាំងនៅក្រៅប្រទេស និងក្នុងប្រទេសមួយចំនួន តែងតែនាំគ្នាប្រកាសចង់ឲ្យមានការផ្លាស់ប្តូររបបដឹកនាំនៅក្នុងប្រទេសកម្ពុជា។
យ៉ាងណាក្តី ថ្លែងនៅក្នុងពិធីប្រគល់សញ្ញាបត្រដល់និស្សិតសកលវិទ្យាល័យបៀប្រាយ (BBU) នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី១៦ ខែមីនា ឆ្នាំ២០២៣នេះ សម្តេចតេជោ បានគូសបញ្ជាក់យ៉ាងដូច្នេះថា ៖ «ឥឡូវយើងគួរនិយាយជាមួយគ្នាច្បាស់ៗថា ហេតុអ្វីបានជាគណបក្សប្រជាជនដឹកនាំរាជរដ្ឋាភិបាល គឺហ៊ានអះអាងថា គណបក្សនេះ ដែល ដឹកនាំរាជរដ្ឋាភិបាល និងរដ្ឋាភិបាលជានិមិត្តរូបនៃការផ្លាស់ប្តូរ»។
សម្តេចតេជោបានលើកឡើងថា «ការផ្លាស់ប្តូរ ដោយសារផ្លាស់ប្តូរពីរបបវាលពិឃា.តមកកាន់ការរស់រានមានជីវិតឡើងវិញ។ ការផ្លាស់ប្តូរពីសង្គ្រាមមកកាន់សន្តិភាព ការផ្លាស់ប្តូរពីភាពក្រី ក្រតោកយ៉ាកមកកាន់ស្ថានភាពដែលប្រទេសមួយមានប្រាក់ចំណូលមធ្យមកម្រិតទាប និងអាចឈានដល់ការផ្លាស់ប្តូរនៅឆ្នាំ២០៣០ ជាប្រទេសមានប្រាក់ចំណូលកម្រិតខ្ពស់ ហើយនៅឆ្នាំ២០៥០ទៅ ជាប្រទេសមានប្រាក់ចំណូលខ្ពស់»។
សម្តេចគូសបញ្ជាក់ថា ៖ «នេះជាការមានចរិតជាក់ស្តែងនិយមដែលយើងបានឃើញ សូម្បីតែខ្ញុំចុះពីរថយន្តមិញ ខ្ញុំអើតមើលឃើញអគារមួយខ្ពស់ ដល់សួរអ្នកនៅជិតមិនដឹងរបស់អ្នកណាផង។ សូម្បីតែកោះពេជ្រ ដែលពីដើមឡើយគ្រាន់តែជាកន្លែងនាវាមួយដឹកជញ្ជូនហើយលិច «…» អ៊ីចឹងខ្ញុំឯកសារទុកវីដេអូ។ អ៊ីចឹងទីក្រុងភ្នំពេញពេលនោះមានអគារខ្ពស់តែមួយទេ ប៉ុន្តែឥឡូវមានអគារច្រើន រហូតដល់ច្រើនជាន់ដល់ជាង៤០ជាន់ទៀត»។
សម្តេចនាយករដ្ឋមន្ត្រីបានលើកឡើងថា «អ្វីដែលរីកចម្រើនមកដល់ពេលនេះ គឺជានិមិត្តរូបនៃការផ្លាស់ប្តូរ ដូច្នេះអ្នកដទៃគេអាចមានសិទ្ធិនិយាយថា គណបក្សប្រជាជនកម្ពុជា គឺជាគណ បក្សតែមួយគត់ដែលនាំមកនូវការផ្លាស់ប្តូរនៅកម្ពុជា។ សម្តេចតេជោបញ្ជាក់បន្ថែមថា ៖«អ៊ីចឹងចាប់ពីពេលនេះតទៅ គណបក្សប្រជាជនក៏និយាយអំពីខ្លួន ក៏ជានិមិត្តរូបនៃការផ្លាស់ប្តូរជាក់លាក់មួយ ហើយយើងក៏បានធ្វើពិត «…» យើងប្រែក្លាយពីការអត់សាលារៀនមកមានសាលារៀន»។
សម្តេចតេជោបានបន្ថែមថា «អ្វីដែលលើកឡើងមិនគ្រាន់តែជានិមិត្តរូបទេ តែវាជាការផ្លាស់ប្តូរភាពជាក់ស្តែង។ ការភូតកុហកណាមួយមិនអាចគេថា មិនយកដៃបាំងព្រះអាទិត្យបានទេ។ ជាក់ស្តែងនៅគ្រប់បណ្តារាជធានី-ខេត្ត គឺមានការអភិឌ្ឍន៍ទាំងអស់ ដែលខុសពីមុន»។ សម្តេចតេជោនាយករដ្ឋមន្ត្រីបានលើកឡើងថា «អ្វីដែលសម្តេចលើកឡើងពីភាពជាក់ស្តែងនេះ មិនមែនជាការយកបន្លាជួសបន្លានោះទេ តែសម្តេចយកញញួរទៅបង្ក្រាបបន្លាតែម្តង»។
សម្តេចបន្ថែមថា ៖ «រឿងពិតកើតឡើងគឺអ៊ីចឹង តើអ្នកណាធ្វើឲ្យមានការផ្លាស់ប្តូរពិតប្រាកដ? បើសិនជាអ្នកឯងនិយាយតែត្រឹមនិមិត្តរូបនៃការផ្លាស់ប្តូររបប ប៉ុន្តែបើអ្នកឯងនិយាយពីនិមិត្តរូបនៃការផ្លាស់ប្តូរពីសង្គ្រាមមកសន្តិភាព ពីរបបប្រល័យពូជសាសន៍មកកាន់រស់រានមានជីវិត ពីការអន់ឃ្លានមកមានអ្វីដែលមាន ខ្ញុំអាចជឿអ្នកឯង»។
ជាមួយគ្នានោះដែរ សម្តេចតេជោក៏បានចំអកនៅកាន់អ្នកនិយាយពីចង់ឲ្យមានការផ្លាស់ប្តូរយ៉ាងដូច្នេះថា ៖ «ខ្ញុំមិនចង់ផ្លែផ្កាឲ្យអ្នកណាទេ ក៏ប៉ុន្តែនិយាយច្រើនពេកពីនិមិត្តរូប អ៊ីចឹងទេ សម្រាប់គណបក្សប្រជាជនកម្ពុជា ពីពេលនេះតទៅប្រកាសខ្លួនថា ពីពេលនេះតទៅនៃនិមិត្តរូបនៃការផ្លាស់ប្តូរក្នុងប្រទេសកម្ពុជា»។ សម្តេចតេជោបន្ថែមថា «នេះជាសារនយោបាយមួយកាត់ផ្តាច់តែម្តង ដោយសារអ្វីដែលកើតឡើងគឺជារឿងពិត។ ឥឡូវយើងគិតមើល កាលឆ្នាំ១៩៧៩ យើងអត់មានអីទេ តែឥឡូវយើងមានអ្វីខ្លះ?»៕