ពេជ្រពណ៌ផ្កាឈូកលាយស្វាយអាចមានគេហ៊ានឱ្យថ្លៃ៣៥លានដុល្លារ
ទីក្រុងហុងកុង៖ គ្រាប់ពេជ្រពណ៌ផ្កាឈូកដ៏កម្រ និងដេញពន្លឺផ្លេកៗទំហំ១០,៥៧ការ៉ាត់មួយគ្រាប់ត្រូវគេប្រសិទ្ធនាមថាអឹតថឺណល ភីង (Eternal Pink) ឬគ្រាប់ពេជ្រផ្កាឈូកអមតៈ។ គេរំពឹងថានៅក្នុងការប្រកាសដាក់លក់ដេញថ្លៃនៅទីក្រុងញូយ៉កនាថ្ងៃទី៨ ខែមិថុនាខាងមុខនេះ អាចនឹងមានអ្នកហ៊ានឱ្យថ្លៃដល់ទៅ៣៥លានដុល្លារ ឬច្រើនជាងនេះក៏អាចថាបាន។ នេះបើយោងតាមការបង្ហើបឱ្យដឹងពីក្រុមហ៊ុនសូតថឺប៊ី (Sotheby) ដែលមានជំនាញខាងដាក់លក់ដេញថ្លៃគ្រឿងអលង្ការ។
លក្ខណៈពិសេសរបស់គ្រាប់ពេជ្រនេះនៅត្រង់ថាវាមានសម្បុរជ្រះថ្លា ស្រស់ឆើត ពណ៌ស្វាយ លាយស៊ីជម្ពូ ដែលត្រូវគេចាត់ទុកថាជាករណីដ៏កម្របំផុត។ កាលពីពេលកន្លងមក, គេធ្លាប់ឮគ្រាប់ពេជ្រពណ៌ផ្កាឈូកតែមួយមុខប៉ុណ្ណោះ។ ប៉ុន្តែពុំធ្លាប់ឮពេជ្រផ្កាឈូកលាយពណ៌ស្វាយទាល់តែសោះ។ ពេជ្រនេះត្រូវគេច្នៃម៉ូតចេញជារាងខ្នើយកើយ ឬខាស់សឹន សេប (cushion shape) និងជាគ្រាប់ពេជ្រដែលពេញទឹកល្អ១០០% គ្មានប្រជ្រុយ និងគ្មានស្នាមអុជសូម្បីតែ១ចំណុចនៅក្នុងបណ្ដូលពេជ្រ។
លោកហ្វ្រេង អេវើរ៉េត (Frank Everett) ជាមន្ត្រីជាន់ខ្ពស់របស់ក្រុមហ៊ុនសូតថឺប៊ី។ លោកឱ្យដឹងថា «ពេជ្រអឹតថឺណល ភីង ដែលមានពណ៌រលាយសាច់មួយរវាងស៊ីជម្ពូ និងពណ៌ស្វាយនេះ សឹងតែថាជាលក្ខណៈពិសេសតែមួយគត់ដែលគ្មានគ្រាប់ពេជ្រណាមានដូច។ ពណ៌ស្វាយរបស់ពេជ្រនេះធ្វើឱ្យពណ៌ផ្កាឈូករបស់វាមានលក្ខណៈភ្លឺថ្លាកាន់តែខ្លាំង ហើយធ្វើឱ្យពណ៌ទាំង២នេះរលាយសាច់មួយចូលគ្នាខ្លាំងមែនទែន»។
«នៅពេលលោកអ្នកសម្លឹងចូលទៅក្នុងបណ្ដូលពេជ្រកាន់តែយូរ, អ្នកនឹងឃើញថាពេជ្រនេះមានសម្បុរផ្កាឈូកថ្លាគ្មានចំណុចល្អក់សូម្បីតែបន្តិចចាប់ពីជ្រុងម្ខាងទៅជ្រុងម្ខាងទៀត»។ លោកអេវើរ៉េតរំពឹងថាពេជ្រពណ៌ផ្កាឈូកលាយស្វាយមួយគ្រាប់នេះអាចនឹងមានគេហ៊ានឱ្យថ្លៃលើសពី៣៥លានដុល្លារ។
ជាទូទៅ, គ្រាន់តែគ្រាប់ពេជ្រដែលមានពណ៌ផ្កាឈូកអាចលក់បានថ្លៃដល់ខ្ទង់លានដុល្លារបាត់ទៅហើយ ព្រោះវាជាគ្រាប់ពេជ្រដ៏កម្រ។ បន្ថែមពីលើនេះ, នៅពេលពេជ្រមានពណ៌ផ្កាឈូកលាយពណ៌ស្វាយថែមទៀតធ្វើឱ្យវារឹតតែមានតម្លៃ។ «យើងមិននឹកស្មានទាល់តែសោះថាពេជ្រមួយគ្រាប់នេះមានសភាពភ្លឺថ្លា និងម៉ដ្ឋចូលគ្នាយ៉ាងល្អឆើត បញ្ចេញពណ៌ និងរស្មីយ៉ាងចិញ្ចាច។ ពេជ្រទំហំជាង១០ការ៉ាត់អាចបញ្ចេញពណ៌ និងពន្លឺប៉ុណ្ណេះអាចចាត់ទុកថាវិសេសវិសាលបំផុត»។ នេះបើយោងតាមសម្ដីលោកហ្វ្រេង អេវើរ៉េត។
គ្រាប់ពេជ្រនេះត្រូវគេជីកបានពីអណ្ដូងរ៉ែនៃប្រទេសបត់ស្វាណា (Botswana) នៅតំបន់អាហ្វ្រិកខាងត្បូងកាលពីឆ្នាំ២០១៩។ កាលនោះ, វាមានទំហំ២៣,៧៨ការ៉ាត់។ ប្រើប្រាស់រយៈពេល៦ខែ, គេកែច្នៃបានជាគ្រាប់ពេជ្រផ្កាឈូកអមតៈទំហំ១០,៥៧ការ៉ាត់ ដែលមានរូបរាងដូចខ្នើយកើយ។ សូមជម្រាបថា មុនពេលប្រកាសដាក់លក់ដេញថ្លៃជាផ្លូវការ, គេនឹងនាំយកគ្រាប់ពេជ្រនេះទៅដាក់តាំងពិព័រណ៍នៅទីក្រុងហុងកុងចាប់ពីថ្ងៃទី១ ដល់ថ្ងៃទី៧ ខែមេសា។ បន្ទាប់មក នឹងយកទៅតាំងពិព័រណ៍នៅទីក្រុងធំៗមួយចំនួនទៀត៕
ប្រភព៖ New York Post, USA Today