ចាប់ខ្លួនវៀតណាម២នាក់បញ្ជូនទៅតុលាការ ជួលដីខ្មែរ១ហិកតា លួចដាំកញ្ឆានៅមណ្ឌលគីរី
ខេត្តមណ្ឌលគិរី ៖ ក្រោយពីទទួលព័ត៌មានពីក្មេងឃ្វាលគោ សមត្ថកិច្ចធ្វើការស្រាវជ្រាវរកឃើញទីតាំងដាំកញ្ឆាមានទំហំប្រមាណ១ហិតា ឃាត់ខ្លួនជនសង្ស័យជាជនជាតិវៀតណាម ចំនួន២នាក់ ដែលបានជួលដីខ្មែរ លួចលាក់ដាំកញ្ឆា ។
ប្រតិបត្តិការនេះ ធ្វើឡើងនៅវេលាម៉ោង១០ និង៣០នាទីព្រឹកថ្ងៃទី១៥ ខែមេសា ឆ្នាំ២០២៣ ដោយកម្លាំងជំនាញប្រឆាំងគ្រឿងញៀន នៃស្នងការដ្ឋាននគរបាលខេត្តមណ្ឌលគិរី ដឹកនាំបញ្ជាផ្ទាល់ដោយលោកឧត្តមសេនីយ៍ទោ ឡោ សុខា ស្នងការនគរបាលខេត្ត និងដោយមានការសម្របសម្រួលពីលោក អ៊ាង សុគន្ធ ព្រះរាជអាជ្ញារងអមសាលាដំបូងខេត្តមណ្ឌលគិរី និងមានការចូលរួមពីលោកអភិបាល ស្រុកពេជ្រាដា កម្លាំងអធិការស្រុកពេជ្រាដា និងកម្លាំងជំនាញប្រឆាំងគ្រឿងញៀន បានចុះបង្ក្រាបទីតាំងដាំកញ្ឆា ស្ថិតនៅភូមិម៉េប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី ។
កម្លាំងជំនាញបានឃាត់ខ្លួនជនសង្ស័យចំនួន ២នាក់ រួមមាន ៖
ទី១. ឈ្មោះ ង្វៀន វ៉ាន់ហ្វាង ភេទប្រុស អាយុ៣២ឆ្នាំ ជនជាតិវៀតណាម ទីលំនៅភូមវូយបា ឃុំធុងដូរ ស្រុកវិញ ខេត្តងាអាន ប្រទេសវៀតណាម ។
និងទី២. ឈ្មោះ ហ្វាម វ៉ាន់ថាយ ភេទប្រុស អាយុ២៧ឆ្នាំ ជនជាតិវៀតណាម មានទីលំនៅភូមិវូយបា ឃុំធុងដូរ ស្រុកវិញ ខេត្តងាអាន វៀតណាម ។
ចាប់យកបានវត្ថុតាង រួមមាន ៖
១. កញ្ឆាស្ងួតចំនួន ០២កញ្ចប់
២. ជីគីមី ចំនួន ៣០ការុង
៣. ថ្នាំបំប៉នកញ្ឆា ២៧កំប៉ុង
៤. កែវជ័រ បណ្តុះកូនកញ្ឆា ចំនួន ៥០០កែវ
៥. ជញ្ជីងថ្លឹងកញ្ឆាក្រៀម ចំនួន ០៣គ្រឿង
៦. ម៉ាស៊ីនអ៊ុតកញ្ចប់កញ្ឆា ចំនួន ០៣គ្រឿង
៧. ថង់វេចខ្ចប់កញ្ឆា ចំនួន ៤៣៨ថង់
៨. ជីម្សៅបំប៉នកញ្ឆា ចំនួន ០៨កញ្ចប់
០៩. ថ្នាំជ្រលក់កញ្ឆា ចំនួន ១២កំប៉ុង
១០. ថ្នាំបាញ់ស្មៅ ចំនួន ០៤កញ្ចប់
១១. ធុងបាញ់ថ្នាំ ចំនួន ០១
១២. ស្លាកលេខម៉ូតូ(វៀតណាម) ចំនួន ០២សន្លឹក
១៣. ការុងចំនួន ១៧៦ការុង
១៤. អាវសម្រាប់ការពារបាញ់ថ្នាំ ១ឈុត
១៥. ប្រអប់ជ័រដាក់គ្រាប់កញ្ឆា ចំនួន ០២ប្រអប់
១៦. ថ្នាំប៉ូវកញ្ឆា ០១ធុង២០លីត្រ
១៧. ថូរជ័រដាំកញ្ឆា ចំនួន ៧២០ថូ
១៨. សំឡីសម្រាប់បណ្តុះគ្រាប់កញ្ឆា ចំនួន ១២កញ្ចប់
១៩. លិខិតឆ្លងដែនចំនួន ០៣ក្បាល
២០. ប័ណ្ណសំគាល់ខ្លួន ចំនួន ០២សន្លឹក
២១. ឯកសារចំនួន ៤២សន្លឹក ។
កម្លាំងសមត្ថកិច្ច បានកាប់ដើមកញ្ឆាស្រស់ នឹងដុតកម្ទេចចោលចំនួន ១០,៦៧១ដើម មានទម្ងន់ ១,២០៥គីឡូក្រាម ។
បច្ចុប្បន្នជនសង្ស័យទាំង២នាក់ ត្រូវបានឃាត់ខ្លួន ដើម្បីកសាងសំណុំរឿង បញ្ជូនទៅសាលាដំបូងខេត្តមណ្ឌលគិរី ចាត់ការតាមនីតិវិធី៕
«រកឃើញទីតាំងដ៏ធំដាំរុក្ខជាតិល្មើសច្បាប់ជាង១ម៉ឺនដើម និងចាប់ខ្លួនបុរសវៀតណាម២នាក់»
