រាជធានីភ្នំពេញ៖ មកដល់ដើមខែកញ្ញានេះ ម៉ូតូជាអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ជំទាវ បណ្ឌិត ពេជ ចន្ទមុន្នី ហ៊ុនម៉ាណែត ចំនួន៧០០គ្រឿង ក្នុងចំណោម ១ពាន់គ្រឿង ត្រូវបានបញ្ជូនដល់ដៃកងទ័ព និងអង្គភាពទ័ពជួរមុខ។
ការលំបាករបស់កងទ័ពនៅជួរមុខមិនរំលងពីកែវភ្នែក និងការគិតគូររបស់ រាជ រដ្ឋា ភិបាល កម្ពុជានោះឡើយ ជាពិសេសម្តេចមហាបវរធិបតី ហ៊ុន ម៉ាណែត និងលោក ជំទាវ បណ្ឌិត ។ កំលុងពេលសង្គ្រាមឈ្លានដោយកងទ័ពថៃ បានធ្វើឱ្យកងទ័ពជួរមុខ របស់ កម្ពុជាមួយចំនួន រងការខូចខាតម៉ូតូ ហើយកងទ័ពខ្លះ ព្រមទាំងនៅតាមអង្គភាព ទ័ពមួយចំនួនមានតម្រូវការម៉ូតូសម្រាប់ធ្វើជាមធ្យោបាយផងដែរ។
ដោយមើលឃើញពីតម្រូវការទាំងនេះ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត បានរៀបចំទិញម៉ូតូហុងដាវ៉េវ ដោយមានការបង់ពន្ធត្រឹមត្រូវចំនួន ១ពាន់គ្រឿង ចែកជូនដល់កងទ័ពដែលម៉ូតូត្រូវខូចខាតកំលុងពេលផ្ទុះអាវុធជាមួយថៃ ក៏ដូចជាអង្គភាពទ័ពជួរមុខសម្រាប់ប្រើប្រាស់។
បន្ទាប់ពីបានទិញ និងរៀបចំបង់ពន្ធរួចរាល់ហើយនោះ ម៉ូតូត្រូវបានដឹកជញ្ជូនយកទៅចែកជូនកងទ័ព និងអង្គភាពទ័ពជួរមុខជាបន្តបន្ទាប់។ មកដល់ពេលនេះម៉ូតូចំនួន៧០០គ្រឿងហើយ បានបញ្ជូនដល់ដៃកងទ័ព និងអង្គភាពទ័ពស្ថិតនៅជួរមុខ។ ដោយឡែក៣០០គ្រឿងទៀត គ្រោងនឹងដឹកជញ្ជូនទៅកងទ័ព និងអង្គភាពទ័ពជួរមុខនៅចុងខែកញ្ញានេះ។
អំណោយម៉ូតូរបស់សម្តេចមហាបវរធិបតី និងលោកជំទាវបណ្ឌិត បានបង្ហាញច្បាស់ពីការគិតគូរយកចិត្តទុកដាក់របស់សម្តេច និងលោកជំទាវបណ្ឌិតលើសុខទុក្ខ និងការលំបាករបស់កងទ័ព។
កងទ័ព និងអង្គភាពដែលទទួលបានម៉ូតូ បានសម្តែងក្តីរីករាយ និងគោរពអរគុណ ដឹងគុណសម្តេចមហាបវរធិបតី និងលោកជំទាវបណ្ឌិតយ៉ាងខ្លាំងក្លាបំផុត។ កងទ័ព ក៏ដូចជាថ្នាក់ដឹកនាំអង្គភាពទ័ពជួរមុខ បានគូសរំលេចថា សម្តេចមហាបវរធិបតី និងលោកជំទាវបណ្ឌិត ជាមេដឹកនាំដែលតម្កល់សុខទុក្ខរបស់កងទ័ពនៅក្នុងបេះដូង ហើយតែងជួយផ្គត់ផ្គង់ដល់កងទ័ពជាប់ជានិច្ច៕
