ប៉ែន ចំរ៉ុង បានសម្រេចដាក់ពាក្យបណ្តឹងឧទ្ធរណ៍លើសាលក្រមព្រហ្មទណ្ឌផ្តន្ទាទោសដាក់ពន្ធនាគារ
រាជធានីភ្នំពេញ ៖ ថ្មីៗនេះ ផ្ទុះការភ្ញាក់ផ្អើលយ៉ាងខ្លាំងក្នុងពិភពសិល្បៈ ក្រោយពីតារាសម្តែងនិងពិធីករដ៏ល្បីឈ្មោះ លោក ប៉ែន ចំរ៉ុង ត្រូវបានចៅក្រមជំនុំជម្រះនៅតុលាការរាជធានីភ្នំពេញ សម្រេចផ្តន្ទាទោសឱ្យរូបលោកជាប់ពន្ធនាគារ១០ខែ និងពិន័យជាទឹកប្រាក់ ៦០ លានរៀលលើសំណុំរឿងព្រហ្មទណ្ឌមួយ។ តែយ៉ាងណាមិញ បើតាមប្រភពដែលស្និទ្ធនឹងពិធីកររូបនេះ បានថ្លែងប្រាប់ឱ្យដឹងថា ករណីនេះ លោក ប៉ែន ចំរ៉ុង បានដាក់ពាក្យបណ្តឹងឧទ្ធរណ៍លើសាលក្រមព្រហ្មទណ្ឌនេះហើយ។
សូមបញ្ជាក់ថា លោក ស៊ិន សុវណ្ណរ័ត្ន ចៅក្រមជំនុំជម្រះនៃសាលាដំបូងរាជធានីភ្នំពេញ បានសម្រេចផ្តន្ទាទោសតារាសម្តែង និងជាពិធីករ លោក ប៉ែន ចំរុង និងបុគ្គលមួយរូបទៀតឈ្មោះ ង៉ាន់ ពិសី ដែលមានមុខរបរជា «អ្នកនិពន្ធបទចម្រៀង» របស់ផលិតកម្មមួយ ដាក់ពន្ធនាគារក្នុងម្នាក់ៗកំណត់រយៈពេល១០ខែ និងពិន័យជាប្រាក់ក្នុងម្នាក់ៗចំនួន ១ លានរៀល ចូលជាថវិការដ្ឋពីបទ «បរិហា.របង្កាច់កេរ្តិ៍» ដែលប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២១ បទល្មើសដែលមានចែងឱ្យផ្តន្ទាទោសតាមបញ្ញត្តិមាត្រា ៣១១ និង មាត្រា ៣១២ នៃក្រមព្រហ្មទណ្ឌ។ តុលាការក៏បានបង្គាប់ឱ្យឈ្មោះ ប៉ែន ចំរ៉ុង និងឈ្មោះ ង៉ាន់ ពិសី រួមគ្នាសងសំណងទៅឱ្យដើមបណ្តឹងឈ្មោះ គាន ណារិត ចំនួន ៦០ លានរៀល នៅពេលសាលក្រមនេះចូលស្ថាពរ។
យោងតាមសាលក្រមព្រហ្មទណ្ឌចុះថ្ងៃទី ០៧ ខែកញ្ញា ឆ្នាំ២០២២ បានឱ្យដឹងថា សាលាដំបូងរាជធានីភ្នំពេញ បានបើកសវនាការជំនុំជម្រះជាសាធារណៈកាលពីថ្ងៃទី១៦ ខែសីហា ឆ្នាំ ២០២២ នៅចំពោះមុខមេធាវីតំណាងឱ្យដើមបណ្តឹងរដ្ឋប្បវេណី តែកំបាំងមុខជនជាប់ចោទឈ្មោះ ប៉ែន ចំរ៉ុង និងឈ្មោះ ង៉ាន់ ពិសី។ សាលក្រមនេះ ត្រូវបានប្រកាសជាសាធារណៈ កាលពីថ្ងៃទី០៧ ខែកញ្ញា ឆ្នាំ ២០២២ ទុកសិទ្ធិឱ្យប្តឹងទាស់ និងប្តឹងឧទ្ទរណ៍តាមកំណត់ច្បាប់។
ជុំវិញរឿងរ៉ាវខាងលើនេះ លោក ប៉ែន ចំរ៉ុង គិតត្រឹមថ្ងៃទី១១ ខែធ្នូ ឆ្នាំ២០២២ នៅតែបន្តភាពស្ងាត់ស្ងៀមមិនចេញមុខបកស្រាយណាមួយពាក់ព័ន្ធទៅនឹងសាលក្រមផ្តន្ទាទោសដាក់ពន្ធនាគារមកលើរូបលោកដែលបានបែកធ្លាយកាលពីពេលថ្មីៗនេះ។ តារាសម្តែងរូបនេះមិនបានបកស្រាយជាវិជ្ជមានណាមួយពាក់ព័ន្ធបញ្ហាខាងលើនេះនៅឡើយទេ នៅពេលដែលមានការសាកសួរពីបណ្តាសារព័ត៌មាននានា ដោយនៅក្នុងនោះ លោកគ្រាន់តែបញ្ជាក់យ៉ាងខ្លីថា «លោកកំពុងដោះស្រាយរឿងនេះ»។ បើទោះបីជាកំពុងជាប់បណ្តឹងខាងលើនេះក៏ដោយ លោក ប៉ែន ចំរ៉ុង នៅតែបន្តសកម្មភាពសិល្បៈរបស់លោកជាធម្មតា ពោលគឺតារារូបនេះ តែងតែបង្ហោះសកម្មភាពរបស់ខ្លួននៅលើបណ្តាញសង្គមជាបន្តបន្ទាប់។
បើតាមប្រភពដែលស្និទ្ធនឹងលោក ប៉ែន ចំរ៉ុង បានឱ្យដឹងថា រឿងរ៉ាវដំបូងឡើយ គឺពាក់ព័ន្ធនឹងការរកស៊ីជួញដូរដីលក់ដីឡូតិ៍ជាមួយឧកញ៉ាមួយរូប ហើយបន្ទាប់មកក៏មានបញ្ហាចែកលុយកម្រៃជើងសារ (លុយកំម៉ុងសុង)។ ដោយសារតែបញ្ហាលុយនោះ លោក ប៉ែន ចំរ៉ុង ក៏បានប្តឹងឧកញ៉ារូបនោះ ទៅសាលាដំបូងរាជធានីភ្នំពេញ។ ប្តឹងចុះប្តឹងឡើង ក៏ស្រាប់តែលោក ប៉ែន ចំរ៉ុង ចាញ់ក្តី។
យោងតាមសាលក្រមព្រហ្មទណ្ឌលេខ ២៧៦៨ (អ) របស់សាលាដំបូងរាជធានីភ្នំពេញ ចុះថ្ងៃទី ០៧ ខែកញ្ញា ឆ្នាំ២០២២ ដែលចៅក្រមជំនុំជម្រះបានសម្រេចផ្តន្ទាទោស លោក ប៉ែន ចំរុង និង បុគ្គលមួយរូបទៀត ឈ្មោះ ង៉ាន់ ពិសី ដាក់ពន្ធនាគារក្នុងម្នាក់ៗកំណត់រយៈពេល១០ខែ និង ពិន័យជាប្រាក់ក្នុងម្នាក់ៗចំនួន១លានរៀល និងរួមគ្នាសងសំណងទៅឱ្យដើមបណ្តឹងឈ្មោះ គាន ណារិត ចំនួន៦០លានរៀលនោះ ក៏បានបញ្ជាក់ថា អង្គហេតុនៃរឿង គឺកាលពីថ្ងៃទី ២៣ ខែកុម្ភៈ ឆ្នាំ២០២១ ឈ្មោះ ប៉ែន ចំរ៉ុង និងឈ្មោះ ង៉ាន់ ពិសេស បានធ្វើការដាក់ពាក្យបណ្តឹងឈ្មោះ គាន ណារិត ភេទប្រុស មកអយ្យការសាលាដំបូងរាជធានីភ្នំពេញ ពីបទ «រំលោ.ភលើទំនុកចិត្ត ពិសេសដោយអភិបាល»៕