ចាប់ខ្លួនបុរសម្នាក់ គំរាមបង្ហោះរូបភាព និងវីដេអូ(គ្មានស្លៀកពាក់)របស់នារីម្នាក់ជាសាធារណៈ
ខេត្តបន្ទាយមានជ័យ ៖ កម្លាំងនគរបាលនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានសហការជាមួយនាយកដ្ឋានកណ្ដាលសន្តិសុខ និងកម្លាំងស្នងការខេត្តចំនួន៣ (បន្ទាយមានជ័យ, កំពង់ធំ និងខេត្តកណ្ដាល) ធ្វើការស្រាវជ្រាវឃាត់ខ្លួនបុរសម្នាក់ ក្រោយពីគំរាមកំហែងបង្ហោះវីដេអូ និងរូបភាព(គ្មានស្លៀកពាក់)របស់នារីម្នាក់ ជាសាធារណៈ ។
ករណីឃាត់ខ្លួនជនសង្ស័យមានឈ្មោះ នៅ ចិន្តា ភេទប្រុស អាយុ៣១ឆ្នាំ ជនជាតិខ្មែរ ប្រើប្រាស់គណនីហ្វេសប៊ុកឈ្មោះ Hea Da បានធ្វើឡើងនៅវេលាម៉ោង៨និង៣០នាទីយប់ថ្ងៃទី២៨ ខែមីនា ឆ្នាំ២០២៣ នៅចំណុចស្ថានីយប្រេង PTT ព្រែកអញ្ចាញ ភូមិចំបកមាស ឃុំចំបកចាស់ ស្រុកមុខកំពូល ខេត្តកណ្ដាល ខណៈដែលរូបគេកំពុងធ្វើដំណើរចេញពីទីក្រុងភ្នំពេញ ។
ជនសង្ស័យបានឆ្លើយសារភាព ជាបឋមថា កាលអំឡុងឆ្នាំ២០២០ ជំនាន់ជំងឺកូវីដកំពុងរាយត្បាត នារីរងគ្រោះ(អាយុ១៤ឆ្នាំ) បានស្គាល់រូបគេ ដែលប្រើប្រាស់គណនីហ្វេសប៊ុកឈ្មោះ Hea Da ហលយបានទាក់ទងស្គាល់គ្នា ព្រមទាំងបានលេងឆាតជាមួយគ្នាផងដែរ ។ បន្ទាប់មក រូបគេបានលួងលោមអោយជនរងគ្រោះ ថតរូបភាព និងវីដេអូ (គ្មានស្លៀកពាក់) ផ្ញើឲ្យខ្លួនមើលជាបន្តបន្ទាប់ ។ រហូតមកដល់ថ្ងៃទី២០ ខែមីនា ឆ្នាំ២០២៣ ខ្លួនបានគំរាមឲ្យជនរងគ្រោះ ថតជាវីដេអូ ជាថ្មីទៀត ផ្ញើឲ្យខ្លួនមើលបន្ថែម ប៉ុន្តែត្រូវបានជនរងគ្រោះបានបដិសេធ ។ នៅពេលនោះ ខ្លួនបានគំរាមជនរងគ្រោះថា (បើមិនធ្វើតាមសំណើរបស់ខ្លួននោះទេ នឹងយកវីដេអូចាស់ៗរបស់ជនរងគ្រោះ បង្ហោះជាសាធារណៈ តែម្ដង) ។
លុះមកដល់ថ្ងៃទី២៨ ខែមីនា ឆ្នាំ២០២៣ ក៏ត្រូវសមត្ថកិច្ច ចាប់ឃាត់ខ្លួនជនសង្ស័យខាងលើនាំមកកាន់នាយកដ្ឋាន ដើម្បីប្រគល់ជូនស្នងការដ្ឋាននគរបាលខេត្តបន្ទាយមានជ័យ ជាម្ចាស់ករណីចាត់ការបន្តតាមនីតិវិធី ៕